புத்தாண்டு வாழ்த்துகள்
உயிர் தாங்கும் உன்
உடலை விரும்பு,
நல் உணவைச் சேர்,
பிறக்கும்
நல் ஆரோக்யப் புத்தாண்டு !
கடிகார முள்ளைப் போல
எதற்கும் எவருக்கும்
நிற்காமல் உழைத்திடு,
பிறக்கும்
பல சாதனைப் புத்தாண்டு !
மழை வரும்
துளிர் விடும் என்றே
விதைகள் புதைக்கப்படுகின்றன,
நேர்மறை எண்ணம் வளர்த்திடு,
பிறக்கும்
தன் நம்பிக்கைப் புத்தாண்டு !
சண்டைக்குப் பின்
ஒரு சாரியேனும் சொல்லிடு
பிறக்கும்,
புதுக் காதல் புத்தாண்டு !
கோபம் தாண்டு
பொறாமை தாண்டு
தடைகள் தாண்டு
ஆசைகள் தாண்டு
வெறுப்பைத் தாண்டு
பயத்தைத் தாண்டு
பொய்களைத் தாண்டு
பிறக்கும்
பெரு மகிழ்ச்சிப் புத்"தாண்டு" !
இருள் தாண்டி
வெளிச்சம் பிறக்கும்
ஒவ்வொரு காலையும்
புத்தாண்டே !
இனிய புத்தாண்டு நல்வாழ்த்துகள்
- நா முரளிதரன்
