சத்தி சிவம்கிரியை ஆதார ஞானவுரு வாம் - உண்மை விளக்கம் 21
திருநெறி 4 – திருவதிகை மனவாசகங் கடந்தார் அருளியது.
நேரிசை வெண்பா
சுத்தவித்தை ஞானமிகும் தொன்மையாம் ஈசுரந்தான்
அத்தன் தொழிலதிகம் ஆக்கியிடும் – ஒத்தலிவை
சாதாக் கியமென்றும் சத்தி சிவம்கிரியை
ஆதார ஞானவுரு வாம். 21
- உண்மை விளக்கம்
பொழிப்புரை:
சுத்தவித்தை ஞானமேறிக் கிரியை குறைந்திருக்கும், பழமையாகிய ஈசுவரத் தத்துவமானது சிவஞானங் குறைந்து கிரியை யேறியிருக்கும்,
சாதாக்கிய தத்துவம் ஞானமுங் கிரியையும் ஒத்திருக்கும்,
எப்போதும் சத்தி தத்துவம் கிரியையாயிருக்கும், சிவதத்துவம் ஆதார ஞானமாயிருக்கும்.
