இருப்புழிப் பெற்றால் கிடப்புழியும் பெற்றுவிடும் - பழமொழி நானூறு 235

நேரிசை வெண்பா

சிறிதாய கூழ்பெற்றுச் செல்வரைச் சேர்ந்தார்
பெரிதாய கூழும் பெறுவர் - அரிதாம்
இடத்துள் ஒருவன் இருப்புழிப் பெற்றால்
கிடப்புழியும் பெற்று விடும். 235

- பழமொழி நானூறு

பொருளுரை:

பெறுதற்கரிய இடத்துள் ஒருவன் இருக்க இடம் பெற்றால் படுத்தற்குரிய இடத்தையும் பெற்றுவிடுவான்; அதுபோல, செல்வரை அடைந்தவர்கள் முன்னர்ச் சிறிய அளவிற்றாய கூழினைப் பெற்று பின்னர் மிகுந்த அளவிற்றாய உணவினையும் பெறுவர்.

கருத்து:

தக்கவர்களைச் சார்ந்தொழுகின் மிகுந்த பயனை அடையலாம்.

விளக்கம்:

இருக்க இடம் பெற்றான் படுக்க இடமும் பெற்றது போல, செல்வரைச் சார்ந்து ஒழுகுவார் முன்னர் மிகச் சிறிய உணவு பெறினும், பின்னர்ப் பெரியதாய உணவினைப் பெறுவர் ஆகவே, தக்க இடத்தைச் சார்ந்தொழுக வேண்டும்.

'இருப்புழிப் பெற்றால் கிடப்புழியும் பெற்றுவிடும்' என்பது பழமொழி.