பெண் .....

ஒன்பது மாத கருவறை கதகதப்பு, முதல் அழுகை,
காற்றில் சுற்றுகையில் குடையாகும் பாவாடை,
கெண்டை கால்களுடன் சண்டை போடும் கொலுசுகள்,
இறுகப் பின்னிய ரெட்டை ஜடை,
புரியாமல் பூரிக்கும் முதல் ரத்தம்,
கண்ணாடி முன் நிற்கும் கர்வ நிமிடங்கள்,
கன்னத்து ரெட்டக்குழிகளின் வெட்கம்,
மார்புடன் அணைத்து போகும் புத்தகங்கள்,
பயத்தில் பிரசவிக்கும் உதட்டு வியர்வை,
தேக வாசனையுடன் சின்ன கைக்குட்டை,
சோகத் துணையாய் ஈரத் தலையணை,
வெட்கத்தில் விரல்விடும் முதல் ஸ்பரிசம்,
அழுகையில் அரவணைக்கும் ஆண்மை,
உயிர் பிளந்து உடையும் பனிக்குடம்,
சுரந்து போகும் தாய்மை துளி,
அம்மா என்ற அழைப்பின் வருடல்,
அத்தனையும் அனுபவிக்க
அடுத்த பிறவியிலாவது பிறக்க வேண்டும்
கள்ளிச்செடிகள் இல்லாத தேசம் ஒன்றில்.