விடியலைத் தின்னும் விளம்பரம்-கே.எஸ்.கலை
விந்தை மிக்க வியாபார உலகில்
சிந்தை தொலைத்த சிற்றின்பப் பேய்கள்
நிந்தை செய்யும் நிலைமையால் இன்று
சந்தை முழுதும் சாக்கடையானது !
அரிசிமா விற்கவும் ஆபாச அழகிகள் -
அவசியம் தேவை என்றொரு நிலைமை !
அவர்களைப் போலவே கற்பினை இழந்த -
அயோக்கியப் பொருட்கள் அங்காடி முழுதும் !
நடிகனும் வீரனும் நடித்திட துடித்திடும்
நல்லதோர் மேடையாய் ஆனது இத்துறை
ஆயிரம் திறமைகள் அவனுள் இருப்பினும்
அத்தனைப் பேரும் ஆண் விபச்சாரிகளே !
விளை நிலமெல்லாம் பழுதாய்ப் போகும்
விலை மதிப்பில்லா உயிர்களும் சாகும்
தரமோ அந்தரம் ஆகிப் போகும்
தாய்ப்பால் கூட விஷமாய் மாறும் !
தரத்தின் இதயத்தை தாக்கும் ஈட்டிகள்
குருதியை உறிஞ்சி இறுதியைக் காட்டும் !
வியாபாரத் தாகம் விகார மோகம்
விடியலைத் தின்னும் விளம்பரமாகும் !
