தமிழ்நாட்டில் தமிழ்க்கொலையா கவிஞர் இரா இரவி
தமிழ்நாட்டில் தமிழ்க்கொலையா ? கவிஞர் இரா .இரவி !
சென்னை உயர்நீதிமன்றம் மதுரைக் கிளையில்
செந்தமிழில் வழக்காட இன்னும் முடியவில்லை !
மீனாட்சியம்மன் திருக்கோவில் கருவறையில்
மதுரத்தமிழ் இன்றும் அனுமதிக்கவில்லை !
அங்காடிகளின் விளம்பரப் பலகைகளில்
அழகு தமிழ் இன்னும் இடம் பெறவில்லை !
தமிழர்கள் பேசிடும் பேச்சு வழக்கில்
தமிங்கிலம் மிக வேகமாக பரவிவிட்டது !
பத்துச் சொற்கள் தமிழன் பேசினால்
பத்தில் எட்டுச் சொற்கள் ஆங்கிலமானது !
பத்திரிகைகளும் போட்டியிட்டு பரப்புகின்றன தமிங்கிலம்
பைந்தமிழைத் தின்னும் திமிங்கிலமானது தமிங்கிலம் !
பண்பலை வானொலிகளும் பரப்புகின்றன தமிங்கிலம்
படிக்காத பாமரப் பாட்டி பேச்சிலும் கலந்தது தமிங்கிலம் !
தொலைக்காட்சிகளும் தொல்லை தொடர்கின்றது
தவறாமல் தினமும் நடக்குது தமிழ்க்கொலை !
நிகழ்ச்சிகளின் பெயர்களில் ஆங்கிலம்
நிகழ்ச்சியில் பேசுவோரின் பேச்சில் தமிங்கிலம் !
இந்த நிலை இப்படியே தொடர்ந்தால் இனி
என்னாகும் நம் தமிழ் தயவுசெய்து சிந்திப்பீர் !
உலகின் முதல் மொழி தமிழ் உணர்ந்திடுக !
உரிய மதிப்பினை நம் தமிழுக்குத் தந்திடுக !
