உதவிடுவீர் உள்ளங்களே உள்ளவரை
தாயில்லா வேளையில் தாயாக
கடமையை உணர்ந்த சேயிவன் !
பாசமிலா உலகிலே பொறுப்பாக
பந்தத்தை கையிலே சுமப்பவன் !
வழியுது ஏக்கமும் விழிகளிலே
வலியது தாங்கிடும் இதயத்திலே !
இளமையும் கடக்குது இதனாலே
வலிமையும் கூடுகிறது மனதிலே !
நம்பிய உடன்பிறப்பும் கரங்களிலே
தம்பியோ தங்கையோ அணைப்பிலே !
அன்னையும் அலைகிறார் பணிதேடி
தன்னையும் வளர்த்திட வழித்தேடி !
புத்தகம் சுமந்திடவோ வழியில்லை
வித்தகம் புரிந்திட இயலவில்லை !
கண்டுக் கொள்வார் எவருமில்லை
தொண்டு உள்ளமும் வளரவில்லை !
வந்துப் பிறந்திட்டோம் வையத்தில்
வாழ்ந்தே தீரவேண்டிய கட்டாயத்தில் !
வழியும் காட்டிடுங்கள் விழியுள்ளோர்
வாழ உதவிடுங்கள் வசதியுள்ளோரே !
இதுபோன்ற இதயங்கள்பல இவ்வுலகில்
இதயங்கள் இணைந்தால் உதவிடலாம் !
வெறுங்கையோடு வருபவர்தான் எவருமே
வெற்றுடலே திரும்புகையில் அனைவருமே !
புரிந்திடுவீர் வாழ்க்கையின் தத்துவத்தை
உதவிடுவீர் உள்ளங்களே உள்ளவரை !
பழனி குமார்
