பொழுதுகள்
எல்லா காலைப் பொழுதுகளும்
ஒன்று போல் துவங்குவதில்லை
சில..
தூக்கம் வரா விழிப்போடு
துவங்கலாம்
சில..
கனவுக்காக தூக்கம் தொடரும்
சுகத்தோடு
ஒரு சில..
அழும் குழந்தையின்
அவஸ்தை புரியா தவிப்போடும்
என்றைக்கும் போல்
இன்றைக்கு இருமலில்லாத தாத்தா
இருக்கிறாரா இல்லையா
ஊர்ஜிதப்படுத்தும் முனைப்போடும்
வேறுசில..
கவலைகளின் காலடி ஓசையோடு
துவங்கலாம்
மற்றும் சில..
பேப்பர்கார பையனின்
பிடிவாத மணியொலியோடு
என்றேனும் ஒரு காலைப்பொழுது
நம் மரணத்தோடு!
-ப்ரணா (எனது "தானியம் கொத்தும் குருவிகள்" தொகுப்பிலிருந்து...)
