கொடுமையிலும் கொடுமை

கடமையென எண்ணி
கை கொடுத்து உதவி
உயர்த்தி கரை சேர்த்து
உச்சம் தொடவைத்து
வெற்றி கண்டவர்- முடிவில்
தோற்று போனதுபோல்
துயரத்தில் மூழ்கினார்

சொகுசு வாழ்க்கைக்கு
சொர்க்கலோகம் போக எண்ணி
சிறகு விரித்த குஞ்சு
சொந்தத்தை உதறிவிட்டு—பெற்றோரை
சோகம் சுமக்கவைத்து
சுடுகாட்டில் விட்டுபோனால்
சொல்லி அழ வார்த்தையேது!

அந்திம காலத்தில்
வந்தமர்ந்து வாழுமிடம்,
சொந்தத்தையும், நட்பையும்
மொத்தமா தொலைத்துவிட்டு
பொழுதை தள்ளும்
உணர்வற்ற ஜடங்களாய்
உயிர்வாழும் முதியோர் இல்லத்தில்

காண வருவோரிடம்
குறையொன்றுமில்லை
மகிழ்வோடு வாழ்வதாய்
மனதார சொன்னாலும்
துடிக்கும் உதடுகளும்
கண்களில் திரளும் கண்ணீரும்
காட்டிக்கொடுத்துவிடும்

சாப்பாட்டு மணியடிக்க
சமையல்கூடம் போக
தட்டைக் கழுவியெடுத்து
தட்டுத் தடுமாறி வரிசையில் நிற்கும்
பெற்றோரைக் காணும்
எந்த பிள்ளையானாலும்—பரிதவிக்கும்
பாவம் செய்ததுபோல்

வாழ வழிகாட்டி
உயர்த்திவிட்ட பெற்றோரை
பேணி காக்காமல்
பிள்ளைகளின் புறக்கணிப்பால்
தனக்குதானே தண்டனைக்
கொடுத்துக் கொண்டு வாழ்வது
கொடுமையிலும் கொடுமை.