மழை மழை
" எதற்கெடுத்தாலும் அலட்டிக் கொள்ளும் இந்த மனிதர்கள் எப்போது தான் திருந்துவார்களோ? ".
மேகங்கள் இரண்டு பேசிக்கொண்டிருந்தன..
" பரலோகத்தில் இருக்கும் எங்கள் பரம பிதாவே, எங்களைக் காத்து இரட்சிப்பீராக. "
தேவாலயங்களில் பிரார்த்தனை வானைத் தொடுகிறது..
சாலைகளில் வெள்ளம் பெருக்கெடுக்கும் நடைபாதை மூழ்கிப் போக முதியவர் தடுமாறி, தடுமாறி இடறிவிழுகிறார்...
வீடுகளில் முடங்கிய மனிதர்கள்...
" மிட்டாய் வேண்டும் அம்மா. "
கெஞ்சுகிறது குழந்தை...
" மழையில் நனைந்தால் காய்ச்சல் வரும். மிட்டாயெல்லாம் கிடையாது. சும்மா இரு. "
மிரட்டுகிறது அம்மாவின் குரல்...
அழுகிறது குழந்தை...
" அரசாங்கம் உதவ வேண்டும். ஏற்பட்ட நஷ்டத்திற்கு பொறுப்பேற்று நஷ்ட ஈடு வழங்க வேண்டும். "
ஊடகங்களின் கதறல்கள்...
" வானம் பொழிகிறது. பூமி விளைகிறது. உனக்கு நான் ஏன் கொடுக்க வேண்டும் கிஸ்தி? "
கட்டபொம்மன் திரைப்படம் கைபேசியில் காணோளியாய் நானும் கண்டு இரசித்துக் கொண்டிருக்கிறேன் மிகவும் ஆர்வமாக...
கலங்க வேண்டிய அவசியமில்லாமல் கலங்கிக் கொண்டே இருக்கிறோம்..
கலங்கிக் கொண்டே வாழ்கிறோம்...
அந்தக் கலக்கத்தில், பதற்றத்தில் வாழ்நாளில் பாதியைத் தொலைக்கிறோம்...
