ஸ்மார்ட் ஃபோன் சிறுவர்களுக்கு!!

வெறும் வயிறும் கதிர் வெயிலும் சாரமில்லை..
தெருப்பிள்ளைகள் எங்கள் விளையாட்டு களத்திலே!

படபடக்கும் பட்டாம்பூச்சி..மெய்மறந்து மதுரம் உறிஞ்சும் செம்பருத்தியில்....
அலேக்காய் மாட்டும் எங்கள் நூற்கண்ணியில்!!!

கள்ளிப்பூ மொட்டெலாம் விளமீனாகும்...
இலைகொளை கீரை வகையாகும்....
குட்டி குட்டி கடைகளிலே!!

சீலாந்தி இலை கூட ஒலிக்கினிய பீப்பியாகும்...
சிறுவர் எங்கள் நாதஸ்வர கச்சேரியில்!!

நாயுருவி ஒட்டிக்கொள்ளும் காற்சட்டையில்..
ஒத்தையடி பாதையில் கால்கடுக்க நடக்கையிலே.!!

கடகட காளைவண்டி, வட்டமிட்டு போரடிக்கும் திமில்காளைகள்...
சலசல நெல்மணி சலிப்பு சத்தம் அறுவடை காலத்திலே.!!!

அடிக்கிற காற்றினிலாலே விழும் புளி...
அத்தனையும் பொறுக்க ஆளிருக்கும் மாசி மாதத்திலே.!!!

அம்புலி முற்றத்திலே..பசுஞ்சாணி மேவிய திண்ணையிலே...
அமர்ந்திருந்து அலுக்காமல் கதைகேட்போம் ஆச்சிவீட்டில்!!!

ஏக்கப் பெருமூச்சும் அசைபோடும் நினைவுகளும் என்மனதில்...
ஸ்மார்ட் ஃபோனில் விளையாடும் நம் பிள்ளைகள் இதையறியட்டுமே!!!