வலியார்மற் றொன்றானும் உய்யார் - நீதிநெறி விளக்கம் 96

நேரிசை வெண்பா

மெலியார் விழினும் ஒருவாற்றான் உய்ப
வலியார்மற் றொன்றானும் உய்யார் - நிலைதப்பி
நொய்ய சழக்கென வீழாவாம் வீழினும்
உய்யுமால் உய்யா பிற. 96

- நீதிநெறி விளக்கம்

பொருளுரை:

நிலை தவறி கனமில்லாத பொருள்கள் விரைவில் விழமாட்டா, ஒருவேளை விழுந்தாலும் பிழைக்கும்; கனமான பொருள்கள் நிலை கெட்டு விழுந்தால் பிழைக்க மாட்டா;

அதுபோல, சிறியோர் தம்நிலையினின்று தவறினும் ஒரு வழியாக பிழைத்துக் கொள்வர்; பெரியோர் (தம் நிலை தவறினால்) வேறு எந்த வகையாலும் பிழைக்கமாட்டார்.

விளக்கம்:

மெலியார், வலியார் என்றது இங்கே முறையே இல்லறத்தாரையும் துறவிகளையும் நோக்கிற்று.

சிறியர் நிலைதவறின் அவர் கீழோராகையால் அவர்நிலை தவறினதை உலகம் நன்கறியாது:

பெரியாரோவெனின் தன்னிலை கெட்டால் உலகெலாம் அது பரவும். ஆகலின், பின்பு அவர்கள் பெருமையடைதல் அரிது. 'நிலைதப' என்றும் பாடம்.

கருத்து:

மேனிலையிலுள்ளார் அந்நிலை தவறின் பின் ஒரு வழியானும் உய்தலரிது.