கரப்புச்சொல் கீழ்கள்வாய்த் தோன்றி விடும் - நான்மணிக்கடிகை 96
இன்னிசை வெண்பா
வடுச்சொல் நயமில்லார் வாய்த்தோன்றும் கற்றார்வாய்ச்
சாயினுந் தோன்றா கரப்புச்சொல் - தீய
பரப்புச்சொல் சான்றோர்வாய்த் தோன்றா கரப்புச்சொல்
கீழ்கள்வாய்த் தோன்றி விடும். 96
- நான்மணிக்கடிகை
பொருளுரை:
பழிச் சொற்கள் அன்பில்லாதாரது வாயில் பிறக்கும்;
அறிவு நூல்களைக் கற்றவரது வாயில் வஞ்சனைப் பேச்சுக்கள் அவர் இறந்துவிட நேர்ந்தாலும் பிறவாது;
தீயவற்றைப் பரப்புதலால் ஆகும் பேச்சுக்கள் மேன்மக்கள் வாயில் தோன்ற மாட்டாது;
ஒன்றனை மறைத்தலும், குற்றமுமாகிய சொற்கள் கீழ்மக்களது வாயில் பிறந்துவிடும்.
விளக்கவுரை:
வடு - பழி. சாயினும் - இறப்பினும். தீய பரப்புஞ் சொல் - கோட்சொல்;
சான்றோர் - நல்லியல்புகள் நிறைந்தோர். கீழ்கள் - இழிவான வியல்புடையவர்கள்;
நயம் - நட்புக் குணம், அன்பு; பரப்புச் சொல் - இல்லாத பழிச்சொற்களை ஏற்றிப் பலரறியக் கூறுதல்.