வேகத்தின் வேகம்

அன்றும் எல்லோரும் வேகமாக சென்று கொண்டிருந்தனர். எதையோ தேடி எல்லோர் பயணம் இருப்பது போல் தோன்றினாலும், சிலர் தொலைந்ததை தேடுபவர் போல் மிக வேகமாகச் செல்கின்றனர். நிச்சயம் உலகம் எல்லோருக்கும் புதிராகத் தான் இருக்கிறது, அவனுக்கும் அப்படி தான் இருந்தது. அவன் பார்ப்பதற்கு சினிமா நடிகர் மாதிரி இல்லாவிட்டாலும் நிச்சயம் ஒரு முறை பார்க்கத் தூண்டும் முகம் கொண்டிருந்தான். எல்லோரும் போல் அவனும் வேகமாகச் சென்று கொண்டிருந்தான் அந்த நான்கு வழிச்சாலையில்.

ஒவ்வொரு முறையும் அவன் செல்லும் போது ஏதோ ஒன்று தடங்கலாகவே இருந்து கொண்டிருக்கும், ஒன்று அவன் ஏதோ ஒன்றை மறந்து வந்திருப்பான் இல்லை என்றால் அவன் பார்க்கச் செல்லும் நபர் அவசரமாக வெளியில் சென்றிருப்பார். நிச்சயம் இன்று பார்த்து விட வேண்டும் என்ற நோக்கில் தன் பயணத்தினை விரைவு படுத்தினான். அவன் ஒரு வளைவில் திரும்பி மறுபடியும் நேர்கோட்டிற்கு செல்லும் போது அந்த பேரூந்து அவனை கடந்து சென்றது, அதில் ஒரு மஞ்சள் நிலா அழகாய் பறந்து சென்றது. ஒரு நொடி தான் அவளைப் பார்த்திருப்பான், அந்த அழகு நிச்சயம் அவனை வெகுவாக ஈர்த்தது. மறுபடியும் பார்க்கத் துடிக்கும் அந்த அழகு முகம், அவனை ஒரு சில நொடிகள் நிச்சயம் ஸ்தம்பிக்கச் செய்தது. அதற்குள் பேரூந்து அவனை கடந்து சிறிது தூரம் சென்று விட்டது. அந்த மாலை நேரம், சூழ்நிலை மட்டும் இதமாக்க வில்லை அவன் மனநிலையும் தான்.

தாண்டிச் சென்ற பேரூந்தினைத் தொட்டு விட துடித்தான், தன் பைக்கில் வேகத்தினை அதிகப்படுத்தினான். தொட்டு தொட்டு சென்றது பேரூந்து மட்டுமல்ல அவள் அழகு முகமும் தான். அவளும் நோக்கினாள், அவளுக்கு நிச்சயம் இவன் யார் என்று தெரியாது, ஆனால் அவன் வேகம் அவளை ஒரு சில நொடிகளாவது பார்க்கத் தூண்டியது. ஏதோ சொல்ல நினைத்து அவள் எத்தனிக்கும் முன்னே எல்லாம் முடிந்தது. அவன் வேகமாக தொட்டுச் செல்ல முற்படுகையில் அந்த அதிவேகம் அவனை மட்டுமல்ல அவனின் நினைவுகளையும் சேர்த்து சுமந்து சென்றது. அவன் வேகம் கட்டுப்படுத்த முடியாமல் நிலை தடுமாறினான், ஒரு சில நொடிகளில் அவன் பயணித்த சாலை, அவனைச் சுமந்து செல்ல உதவியாய் வழிவிட்டது. வேகம் எதற்குமே தீர்வு இல்லை, விவேகம் இல்லாமல் இருந்தால்.