தேனை விற்பனை செய்யும் பூக்கள்
ஆதவன் அஸ்தமிக்க
சாமந்தி மஞ்சளில்
கடற்கரை!
அலைகளுக்குள் போட்டி
கரையை முதலில்
தொடுப்பவர் யார்?
நுரையோடு கரைவந்து
வலைகளை தேடும்
நண்டுகள்!
பரந்த மணலில்
பதிக்கப்பட்ட புதியகவிதைகள்
குழந்தைகளின் பாதச்சுவடுகள்!
கவிதை தியானத்தை
கலைப்பதாய் ஓர்
குரல்!
சுண்டல்,சுண்டல்,
சூடான சுண்டல்,
மாங்காய்,தேங்காய்,பட்டாணி சுண்டல்!
மக்கள் மத்தியில்
கெஞ்சலாய் வணிகம் செய்யும்
பிஞ்சுகளின் குரல்கள்!
மெலிந்த மேனியின்
மானத்தை காக்கும்
கிழிந்த ஆடைகள்!
கிருக்கியே தேய்ந்துபோன
எழுதுகோலின் மூக்காய்
அவனின் பாதங்கள்!
பிரம்மனின் கஞ்சத்தனமோ?
சுண்டல் குரலுக்கு
சொந்தமான குழந்தையின்
ஒட்டிய வயிறு!
வற்றிய குளத்தில்
சிக்கிய சேற்றுமீன்களாய்
அவனின் கண்கள்!
என்
இதயத்தில் இருள் சூழ,
இமைகள் இடிஇடிக்க,
மழைத்தூரும் முன்னமே!
சுண்டல் சுமையுடன்
சுறுசுறுப்பாய் அவனின் ஓட்டம!
சற்றே தூரத்தில் மாபெரும்
அரசியல் கூட்டம்!
குழந்தை தொழிலாளர்
ஒழிப்பு விழிப்புணர்வு மாநாடாம்!
அக்கூட்டத்திலும் அதேகுரல்
சுண்டல், சுண்டல்,
சூடான சுண்டல்,
மாங்காய், தேங்காய்,
பட்டாணி சுண்டல் !
சுன்டலோடு சேர்த்து
எதிர்காலத்தையும் விற்றுவிடும்
குழந்தைகள்,
தேனை விற்பனை செய்யும் பூக்களாக!
