+நிறைவேறுமா என் ஆசை+
நிலவின்மேல் நீர்தெளித்து கோலமிட ஆசை!
நிம்மதிஎனும் வீடுகட்டி குடியிருக்க ஆசை!
நீங்காத வானவில்லாய் நித்தம்இருக்க ஆசை!
நீலவான தோட்டத்தை குத்தகைஎடுக்க ஆசை!
எறும்பின்மேல் ஊர்ந்துசெல்ல நெடுநாளாய் ஆசை!
கரும்பிற்குள் ஒளிந்துகொண்டு விளையாட ஆசை!
நெருப்புடுத்தி சூரியனில் நீந்திவர ஆசை!
விருப்பம்போல உருமாறி உலவிவர ஆசை!
விரலிடுக்கில் இலைபோட்டு விருந்துவைக்க ஆசை!
இரவிற்குள் மர இலையை எண்ணிவிட ஆசை!
வரவிருக்கும் வரலாற்றை தெரிவிக்க ஆசை!
பரம்பொருளை வரவழைத்து வரம்கொடுக்க ஆசை!
தோகைசெய்து மயிலுக்கு விற்றுமகிழ ஆசை!
நாகப்புற்றில் நாள்முழுதும் படுத்திருக்க ஆசை!
சோகமின்றி பனிமலையில் தவமிருக்க ஆசை!
தாகத்தோடு கேட்கிறேன் நிறைவேறுமா என் ஆசை?
குறிப்பு: மீள்பதிவு
