தீபாவளி வலி
உயிரற்ற ஒன்றுக்கு
மேலாடை சுற்றுகிறோம்
உடம்பின் ஓர் ஆடைக்காய்........
ஒளிர திரிவைப்பதென்னவோ நாங்கள்தான்
வீட்டில் ஒளியில்லை!
வண்ணங்களை பூசிப்பூசி
கரியாகிபோகிறது எங்கள் மேனி !
திரிகளில் வைக்கும் நெருப்பு - எங்கள்
உயிர் நரம்புகளில் வைக்கப்படும் கொள்ளி
நெருப்புகளின் விளையாட்டில்
நாங்கள் வெடித்துச்சிதறிப் போகிறோம்....!
வெடிக்கும் உங்கள் தீபாவளி
எங்கள் வாழ்வில் தீராவலி!
மருந்துகளே காயமாக்கும்
விந்தையான கொடுமை
எங்களுக்கு மட்டும்தான்.....
சாவும்கூட எங்களது பிழைப்பில்தான்
முதலாளிகளின் பிழைப்பும்கூட
எங்கள் சாவில்தான் !
கவிதாயினி நிலாபாரதி
