நெஞ்சு பொறுக்குதில்லையே - மண் பயனுற வேண்டும் கவிதைப் போட்டி - இராஜ்குமார்
நெஞ்சு பொறுக்குதில்லையே
~~~~~~~~~~~~~~~~~~~~~~~~~~~~
மூளைப் பிளவிலும் அழுத்தம் செலுத்தும்
விற்பனைக்கல்வி - சேவையைப் பரப்புமா ..?
கழிவானத் தெருவிலும் விளம்பரம் ஒட்டும்
அரசியல் - வறுமையை ஒழிக்குமா ..?
உண்மை புதைத்து பணத்தில் மிதக்கும்
ஊடகம் - உயிர்வலியை உணர்த்துமா ..?
காமமே காட்சியாக நாகரீகம் நசுக்கும்
திரைகள் - புரட்சியைப் புகட்டுமா ..?
நெகிழி நிறைத்து மதுவில் மடியும்
மனிதன் - வாழ்வியல் சிற்பியா ..?
பிழையின் உருவாய் உழைப்பைத் திருடும்
ஆடம்பரம் - உயிர்த்துளியைச் சுரக்குமா ..?
ஊழல் ஊட்டலில் வன்முறை வடிவமான
சட்டம் - சமத்துவம் எழுதுமா ..?
பல்லுயிர் அழித்து மரத்தைச் சிதைக்கும்
உலகமயம் - உயிர்த்தலை விதைக்குமா ..?
சுவாசம் திணித்தும் உயிர் சுருங்கி
பிணமாகும்முன் - நீர்மூல நதியாவோம் ...
நிலம் பிளந்து எரிமலைப் பிழம்பில்
மூழ்கும்முன் - விவசாய வேராவோம் ....
- இராஜ்குமார்
