ஆருயிர் நண்பன்

இவன் ஒழிந்தான் எனும் செய்தி
உன்னை எட்டும் வேளையில்
வீணாக உன்
இரு சொட்டுக் கண்ணீரை
விரயமாக்காதே ..
என் ஆருயிர் நண்பனே..

என் முன் அதைக் காட்டவும்
அதை நான் நம்பவும் ..
வாய்ப்பு இல்லை என்பதால்
கொஞ்சம் சோகத்தை மட்டும் உன்
முகத்தில் காட்டிக்கொள் ..
உன்னை சுற்றியிருப்பவர்களுக்காக!
அது போதும்..!

என்னுடைய முடிவினால்
எந்த வேலையும் நிற்கப் போவதில்லை..
குறிப்பாக உனக்கு..!
என் மறைவு ..
உனக்கு பெரும் இழப்பு..
என்பது உண்மைதான் ..!

என் பொருளும் புகழுரையும்
உன்னிடத்தில் சென்று சேரும் வழி
அடைக்கப்பட்டு விடும் என்பதால்..
உனக்கு பெரும் இழப்பு ஏற்படும்
என்பது உண்மைதான் !

ஒன்றை மட்டும் நினைவில் கொள்..
நன்றாக ..
தேடிப்பார்த்து விட்டுத்தான் சொல்கிறேன்..
என்னைப் போல் உன்னை
முழுதாக நம்பி ஏமாறும்
முட்டாள்கள் யாரும் இங்கே ..
இருப்பதாகத் தெரியவில்லை..
கொஞ்ச காலத்திற்கு கஷ்டம்தான்..
உனக்கு..!
இப்போதே உன்னை தயார்படுத்திக் கொள்
என்பதற்காக தான்
இந்த மடலை நான் அனுப்புகின்றேன்
ரகசியமாக..வைத்துக் கொள்!