மீண்டும் மீண்டும்

மலையில் தோன்றி கலையில் மீண்டும் மீண்டும் வளர்ந்த மாத்தமிழ்
மூத்த தொன்மையால் மீண்டும் மீண்டும் மூவேந்தர் காத்த மூத்தமிழ்
சங்கம் வைத்து மீண்டும் மீண்டும் அங்கம் பெருக்கிக்கொண்ட தங்கத்தமிழ்
இயல் இசை நாடகமென மீண்டும் மீண்டும் முப்பொழுதும் வளர்ந்த முத்தமிழ்
மொழி என்பதன் இலக்கணமாய் மீண்டும் மீண்டும் விளங்கும் தொல்தமிழ்
பூத்த இளமையால் மீண்டும் மீண்டும் பூலோகம் போற்றிய பூந்தமிழ்
வாய்த்த வளமையால் மீண்டும் மீண்டும் வரலாறு வாழ்த்தும் வண்டமிழ்
மீண்டும் மீண்டும் சேர்த்த செம்மையால் செம்மொழி ஆன செந்தமிழ்
ஈர்த்த இனிமையால் இயல்தோறும் மீண்டும் மீண்டும் வளரும் இன்றமிழ்
பெற்ற பெருமையால் வெளிநாட்டோர் மீண்டும் மீண்டும் வணங்கிய நற்றமிழ்
உற்ற தாய்மையால் மீண்டும் மீண்டும் பல மொழிகள் ஈன்ற தாய்த்தமிழ்
நாட்டிய வாய்மையால் மீண்டும் மீண்டும் வளியெல்லாம் நிறைத்த தென்றமிழ்
உதட்டசைவே உயிரெழுத்தாகி மீண்டும் மீண்டும் உயர்ந்த தமிழ்
பொருளுக்கு இலக்கணம் கண்டு மீண்டும் மீண்டும் பெருத்த தமிழ்
ஈரராயிரம் வருட இலக்கியங்கள் நூறாயிரம் கொண்டு மீண்டும் மீண்டும் பழுத்த தமிழ்
வள்ளுவன் குறளால் மீண்டும் மீண்டும் வானருள் வாங்கிய வரத்தமிழ்
காப்பியங்கள் மூலம் மீண்டும் மீண்டும் கதைகள் பல கூறிய கவின்தமிழ்
கம்பன் காவியத்தால் மீண்டும் மீண்டும் கவிதைமழை பெய்யும் கவித்தமிழ்
அகமென்று பிரித்து மீண்டும் மீண்டும் சுகமெல்லாம் காட்டிய காதல்தமிழ்
புறமென்று பிரித்து மீண்டும் மீண்டும் திறமெல்லாம் கூறிய வீரத்தமிழ்
கவிதைகள் மூலம் மீண்டும் மீண்டும் கடவுள்கள் உயிர்பெற்ற கலைத்தமிழ்
கவிஞர்கள் பலரை மீண்டும் மீண்டும் கடவுள்களாக்கிய தெய்வததமிழ்
கடல்கொண்ட போதும் உடலுதறி மீண்டும் மீண்டும் உயிர்வளர்த்த உயிர்த்தமிழ்
யுத்தம் பல வந்தும் ரத்தமும் சித்தமும் கெடா மீண்டும் மீண்டும் சுத்தமாகும் தமிழ்
பேசும்போது இதழெல்லாம் மீண்டும் மீண்டும் இதமாகும் இசைத்தமிழ்
கேட்கும்போதெல்லாம் காதோரம் மீண்டும் மீண்டும் தேனூறும் தீந்தமிழ்
காய்ப்பு பல கண்டும் மூப்பெய்தா மீண்டும் மீண்டும் கன்னியாகும் தமிழ்
எவ்விடம் சென்றாலும் மீண்டும் மீண்டும் மகுடம் சூடும் மானத்தமிழ்
இமயத்தில் மட்டுமல்ல இணையத்திலும் மீண்டும் மீண்டும் கொடிநாட்டிய கொற்றமிழ்
யுகம் பல கடந்து தாகம் தீரா மீண்டும் மீண்டும் முகநூலில் வாழும் புதுத்தமிழ்