வழுக்கை - குறட்பாக்கள்

கவிதை புனைய கருவும் கிடைத்தால்
குவிப்போ மெழுதிக் குறள் . 1

அடர்ந்த முடியும் அடிக்கடிக் கொட்ட
தொடரும் வழுக்கைத் துயர் . 2

கருத்த சிகையில் கலக்கம் வருமேல்
வருத்தி யெடுக்கும் வலி . 3

வழுக்கை விழுந்திட வாட்ட மெதற்கு
அழுக்கே யிராதே அழகு . 4

வெளுக்குமோ வென்ற விசனமே யில்லை
பளுவின்றிக் காத்திடும் பார் . 5

முடியிலா மண்டையில் மூளை யதிகம்
இடிந்து விடாதே இனி . 6

இரவியும் சுட்டால் எரியும் தலையும்
சிரசினில் தொப்பி சிறப்பு . 7

சீவி விடுதற்கு சீப்புகள் தேவையோ
கோவித் திடாமலே கூறு . 8

வழுவழு வென்றே வடிவா யிருக்கும்
வழுக்கைத் தலையும் வனப்பு . 9

ஆலயம் சென்றால் அடித்திடும் மொட்டையின்
கோலமே யீதன்றோ கூறு ? . 10