வீணாகப் போவது தலைமுறையே
ஆடுமேய்க்க செல்கிறாள் மகள்
கூலிவேலைக்கு சென்றாள் தாய்
இடம்பிடிக்க விரைகிறான் தந்தை
மதுக்கடை வரிசையில் நின்றிட !
ஆயிரம் லிட்டர் பாலாபிஷேகம்
கோவிலில் நேர்த்திக்கடன் நடக்கிறது
வாசலில் குழந்தையின் அழுகுரல்
பசிபோக்க தாயின் கெஞ்சல் !
வாதங்கள் முடிந்தது கைகலப்பில்
மழலைக்கு பெயர் சூட்டுவதில்
இருவேறு மதத்தினர் பெற்றோர்
அறியாமல் சிரிக்கிறது குழந்தை !
சாதிஒழிப்பு மாநாட்டின் தலைவர்
மகளுக்கு மணமகன் தேடுகிறார்
தரகரிடம் விவாதிக்கிறார் வீட்டில்
தன்சாதியில் வேண்டுமென கட்டளை !
இருமாநில அதிகாரிகள் ஆலோசனை
இருநதிகள் இணைப்பு திட்டம்பற்றி
இறுதிசெய்யப்பட்டது முடிவில்
இருபுறமும் கமிஷன் தொகை !
பாலூற்றி வணங்கும் ரசிகர்கள்
பால்குடம் ஏந்தும் தொண்டர்கள்
அலகு குத்தும் அரசியல்வாதிகள்
அரங்கேறும் அன்றாட அவலங்கள் !
முன்பின் அறிந்திடா முகங்கள்
முற்றம்வரை வந்து கெஞ்சிடும்
முடிந்தபின் முகமே மறந்திடும்
தேர்தல் களத்து வேட்பாளர்கள் !
சிந்திக்காத மக்கள் உள்ளவரை
நிந்திக்க வேண்டிய தருணங்கள்
முந்திக்கும் கட்சிகள் உள்ளவரை
பிந்தியிருக்க வேண்டிய நிலையே !
கோட்டை வீட்டுக் கோமான்கள் தானே
கோடிகளை கொட்டிடுவர் உண்டியலில்
கோவணமும் இல்லா மனிதரைப்பற்றி
ஆவணப்படமும் எடுத்திடுவர் நாட்டினில் !
பயன்படுத்த தெரியாத பகுத்தறிவு
பண்படுத்தாத விளை நிலங்களே !
விரயம் அடைகின்ற விளைச்சலால்
வீணாகப் போவது தலைமுறையே !
பழனி குமார்
