பெண்ணியம் எனும் கண்ணியம்
ஆளில்லா அறையிலும் அனிச்சையாய்
தன் சேலையை சரிசெய்துகொள்ளும்போது தெரியும்,
பெண்ணியத்தின் கண்ணியம்.
வயிறுமுட்டிவரும் சிறுநீரை அடக்கமுடியாத
ஆண்களுக்கு மத்தியில், இரத்தக் கசிவையும்
அடக்கிக்கொள்ளும்போது தெரியும்,
பெண்ணியத்தின் கண்ணியம்.
மிருகத்தனமான கணவனால் புண்பட்டாலும்,
புன்முறுவல் பூத்த முகத்துடன்
உலகோடு உறவாடும்போது தெரியும்,
பெண்ணியத்தின் கண்ணியம்.
தன்பசி மறந்து, தாவியோடி தன் பிள்ளை
பசிபோக்க பாலூட்டத் துடிக்கும்போது தெரியும்,
பெண்ணியத்தின் கண்ணியம்.
அருகிலிருப்போர் அவமதிப்பையும் தாண்டி
தன் குடும்பத்தை உயர்வுக்கு கொட்டுவர
உண்மை நேர்மையுடன் போராடும்போது தெரியும்,
பெண்ணியத்தின் கண்ணியம்.
