இணையிலா இளைய சமுதாயம்
வங்கக் கடலே அலைகளை நிறுத்தியது
--தங்கத் தமிழர்களின் சங்கமம் கண்டு !
சுழலும் பூமியே அசைவின்றி நின்றது
--தமிழன் உணர்வை உற்று நோக்கியது !
உலகத் தமிழர் உணர்ச்சிப் பெருக்கோடு
--இணைந்து நின்று ஆதரவை நல்கினர் !
வியப்பால் விரிந்தன விண்ணின் மீன்கள்
--சோர்ந்திடா மனங்கள் சேர்ந்து இருந்ததை !
கலங்கிப் போனது கட்சிகளும் காட்சியால்
--ஓடிவந்தனர் கூட்டாத கூட்டத்தைக் காண !
அரசியல் கலந்திடா போராட்டக் களமதில்
--அன்பும் பண்பும் உருவங்களாய் உலவின !
சுயநலமிலா தலைமுறை அமைதிக் காத்தது
--துளியும் வன்முறை நிகழாத அறவழியது !
இனமான உணர்வுடன் தன்மானம் இழக்காது
--உரிமையை நிலைநாட்ட போராடி வென்றது !
பழமையும் பண்பாடும் வழக்கத்திற்கு வந்தது
--வழக்குகள் மறைந்து வாகையும் சூடியது !
வளரும் இளைஞனே வணங்குகிறேன் உன்னை
--வருங்கால தமிழினம் வாழ்ந்திடும் நிச்சயம் !
பழனி குமார்
