அழகே அழகு எதுவும் அழகே
பூவில் உறங்கும் பனியில் விரியும்
*****பசும் புல்வெளி அழகு...
கோவில் திருவிழாவில் கூடி மகிழும்
*****சொந்த உறவுகள் அழகு...
நிலவின் ஒளியை விளக்காய் வாங்கும்
*****கூரை வீடுகள் அழகு...
உலகமே வியந்து நோக்கும் தூக்கனாங்
*****குருவிக் கூடுகள் அழகு...
தந்தையின் மார்பில் தவழும் மழலையின்
*****கொஞ்சும் மொழி அழகு...
முந்தானையில் குழவியின் முகம் மறைத்து
*****தாலாட்டும் தாய்மை அழகு...
ஆடை துறந்து ஆற்றில் குதிக்கும்
*****சிறுவர்களின் குளியல் அழகு...
ஓடையில் தூண்டிலிட்டுச் சிலையென நின்று
*****மீன் பிடித்தல் அழகு...
ஈர நிலத்தில் ஏரினை இழுக்கும்
*****காளை மாடுகள் அழகு...
தூரமாய் விரட்டினாலும் விளைந்த வயல்
*****அமரும் பறவைகள் அழகு...
பார்போற்ற உழைத்துச் சேறு பூசிய
*****உழவனின் உடல் அழகு...
நேர்வகிடு நெற்றிப் பொட்டோடு மங்கையின்
*****மஞ்சள் வதனம் அழகு...
மறையும் கதிரோடு மலர்ந்து குழல்
*****மணக்கும் மல்லிகை அழகு...
இறைவன் தந்த யாக்கை மனதால்
*****இரசிக்கும் யாவுமே அழகு...
