மீண்டும் ஒரு கருவறை
***********************************************************************************
நிலமே!
என்றும் நடுவுநிலை தவறாதவள் நீ
நல்லோர் தீயோர்
உள்ளோர் இல்லோர்
கற்றோர் மற்றோர்
பாரபட்சமில்லை உன்னிடம்
அனைவரையும் தாங்குகிறாய்
உலக சமநிலைப்படுத்தும்
உனது தேக சிலிர்ப்பினில்
ஏற்றத் தாழ்வின்றி
மீண்டும் ஒரு கருவறையாக
உயிர்களை உன்னுள்
வாங்கிக்கொள்கிறாய்.
என்றும் நடுவுநிலை தவறாதவள் நீ!
உன்னில்
எது விதைக்கப்படுகிறதோ
அதைப் பன்மடங்காக
அள்ளித் தருகிறாய்
முத்துமுத்தாய் கதிர்வகைகள்
கொத்துக்கொத்தாய் கனிவகைகள்
வாசம் வீசும் மலர்கள்
பிணி தீர்க்கும் மூலிகைகள்
உன்னில்
எது விதைக்கப்படுகிறதோ
அதைப் பன்மடங்காக
அள்ளித் தருகிறாய்
பாரபட்சமில்லை உன்னிடம்
அந்தோ!
உன்னில் இங்கே
விஷ வித்துக்களுமல்லவா
விதைக்கப்படுகின்றன..
ஆனால்
என்றும் நடுவுநிலை தவறாதவள் நீ!
விதைக்கப்படுவது
எதுவானாலும்
அதைப் பன்மடங்காக
திரும்பத் தருகிறாய்
பாரபட்சமில்லை உன்னிடம்
உயிரற்றவைகளை
மட்கச் செய்திடும்
ஆற்றல் உடையவளே!
அருமை உயிர்களைக்
களவாடிச் செல்லும்
அந்த விஷ வித்துகளையும்
ஜடமாகக் கருதிடாயோ!
உன்னில்
மட்கிடச் செய்திடாயோ?
நிலமே!
என்றும் நடுவுநிலை தவறாதவள் நீ!
*********************************************************************************************
