கேள்வியுள் இன்னாதன மூன்று - திரிகடுகம் 57
நேரிசை வெண்பா
(’ட்’ ‘ச்’ வல்லின எதுகை)
கொட்டி யளந்தமையாப் பாடலும் தட்டித்துப்
பிச்சைபுக் குண்பான் பிளிற்றலும் - துச்சிருந்தான்
ஆளுங் கலங்கா முறுதலும் இம்மூன்றும்
கேள்வியுள் இன்னா தன 57
- திரிகடுகம்
பொருளுரை:
தாளவோசையால் அளவிட்டு அதற்குத் தகுந்தபடி பாடாத பாடலும், கைதட்டி சோற்றுப் பிச்சைக்குப் போய் வாங்கி உண்ணுபவனுடைய இரைதலும், ஒதுக்குக்குடி இருந்தவன் (அவ்வில்லத்தான்) ஆளும் பண்டங்களை விரும்புதலும் ஆகிய இந்த மூன்றும் கேட்கப்படுபவைகளுள் இன்பத்தைத் தராதனவாம்.
கருத்துரை:
தாளத்துக்கு ஒவ்வாப் பாட்டும், பிச்சையெடுத்துண்பான் பேரிரைச்சலும், ஒட்டுக்குடியன் பெருவீட்டின் பொருளைக் கருதுதலும் இன்பத்தைத் தராதவை.
து – உணவு, துச்சு - சிறிது பொழுது தங்குமிடம்.
