எண்ணருநல் யாக்கைக் கலம்வனையும் எண்ணருநோய் துன்பம் அவர்க்கு – அறநெறிச்சாரம் 153
நேரிசை வெண்பா
உயிர்திகிரி யாக உடம்புமண் ணாகச்
செயிர்கொள் வினைகுயவ னாகச் – செயிர்தீரா
எண்ணருநல் யாக்கைக் கலம்வனையும் மற்றதனுள்
எண்ணருநோய் துன்பம் அவர்க்கு 153
- அறநெறிச்சாரம்
பொருளுரை:
குற்றம் தரும் வினை குலாலனாக நின்று, உயிர் காற்றையே தண்ட சக்கரமாகவும், எழுவகைத் தாதுவையே களிமண்ணாகவுங் கொண்டு குற்றத்தின் நீங்காத நினைத்தற்கரிய உடலாகிய பாண்டத்தைச் செய்யும் அவ்வுடலுள் அதனை யனுபவிக்கும் சீவர்க்கு அளவிடற்கரிய துன்பம் தரும் நோய்கள் பல உளவாம்.
குறிப்பு:
உயிர், உடம்பு, வினை, யாக்கை, நோய் முதலியன திகிரி, மண், குயவன், கலம், துன்பமாக உருவகிக்கப்பட்டுள்ளது.