உரையாடல் என்னோடு
மௌனம்
கொலைகள் செய்ய
புறப்படும் முன்,
உண்மையே - நீ
பேசி விடு !
பல நாள்
சகித்த
எரிமலைகள்
வெடித்துச்
சிதறப் போகிறது,
கோபமே - உன்
எதிர்ப்பைக்
காட்டி விடு !
பொறுமையே - நீ
இன்னும் கொஞ்சம் உறங்கு
விடியலுக்கு நேரம் இருக்கு !
முயற்சியே
அதற்குள் என்ன ஓய்வு,
நீ அடைய வேண்டியது
மேகத்தை அல்ல
வானத்தின் எல்லையை !
சிரிப்பு - அது
மகிழ்வித்தவனுக்கு
கொடுக்கும் சன்மானம்,
செலவழித்து விடு !
சேமித்து வைத்தும்
கடனாளி ஆகாதே !
அழுகையே
உனக்கு அணை கட்டி
ஒரு பயனும் இல்லை - நீ
அமுத நீரா என்ன
அழுக்கு நீர் தானே,
பொழிந்து விடு !
- நா முரளிதரன்
