==//-முதல் காதலி-//== (அஹமது அலி)
மாலைச் சந்திரனும்
மன்மதனும் கைகோர்த்து
அந்திச் சாலையில்
சிந்திக் கிடக்கும் செளந்தர்யங்களை
சொந்தம் கொள்ள வந்தவர்கள்
யாமினி அழைத்துக் கொண்டிருக்கையில்
யவனத்தை சீண்டிச் செல்லலாமோ.?
//////////----///////////------//////////------////////////---////////////
அந்தி விரித்த முந்தியில்
ஆசைக் கிளி மடியில்
கதை கதையாய் கதைக்கையில்
என் கிளி கேட்டது
எனக்கு முன் யாரையேனும்
காதலித்தது உண்டா?
யோசனையே கொள்ளவில்லை
தலையசைத்தேன் ஆம் என்று!
////////------///////////------//////////-------////////////////---//////
மொட்டு விரித்த மல்லிகையாள்
சட்டெனச் சுருக்கினாள் தன்முகம்
மென்னிதழ் பிதுக்கி
வெறுப்பை உமிழ்ந்தாள்
என்னாசை பெருக்கி
பொறுமை விழுங்கினாள்
///////-----////////---///////----////////-----//////-----/////////
அடங்கவில்லை அவள் ஐயம்
மடங்கவில்லை அவள் நாக்கு
தொடங்குவதற்கு அச்சமே கொள்ளவில்லை
பட்டெனக் கேட்டு விட்டாள் பட்டதை
////////----////////-----///////----//////////----///////////----//////
அப்படியாயின்
தாங்கள் கொண்ட காதலில்
வலிய காதல்
என் மீதா? அவள் மீதா?
/////////----/////////---///////////-----////////------/////////--/////
ஐயமில்லை என் ஆருயிரே
நான் அவள் மீது கொண்ட காதல்
உன்னில் கொண்டதிலும் வலிமையானது
என்றுரைத்து முடிக்கவில்லை
அதற்குள்......
/////////----//////////-----///////////------//////////-----/////////
மேகாட்டில் கருக்கவில்லை-ஆனாலும்
அவள் முகம் கருத்தது
மேகங்கள் கூடி முழங்கவில்லை-ஆனாலும்
அவளுக்குள் இடி முழக்கங்கள்
மின்னல்கள் வானை பிளக்கவில்லை-ஆனாலும்
அவள் இதயம் பிளவு கண்டது!
/////////-----/////////-----/////////----////////----/////////-----/////////
கொதிச் சினம் அடங்க
வெகு நேரம் ஆயிற்று
பூமேடையில் தீ நடனம்
அவள் முகத்தில்
ஆகா..!! சினம் கூட இவள் முகத்தில்
அஜந்தா சிற்பங்களை
ஞாபகப் படுத்துகின்றன
////////-----////////------/////-----///////-----///////----////////
சினம் கூட இவளுக்கு அழகென்றால்
கொஞ்சல் முகத்தை
வருணிக்கவும் வேண்டுமா?
இப்போது
அவளுக்குள் தீமழை
எனக்குள் பூமழை
///////----/////////-----////////-----////////----///////---//////
பாவம் அந்த பேதைப் பெண்
என் அன்பை முழுமையாக
எதிர்பார்ப்பது நியாயம் தானே!
என் செய்வாள்?
//////////-----//////////-----//////////------/////////----///////
ஆத்திரம் அடக்கி
சாத்திரம் பழகியவளாய்
தோய்ந்த குரலில்
மீண்டும் கேட்டாள்
அவள் பெயரைத்தான் சொல்லுங்களேன்..!?
//////////----////////---/////////------/////////-----//////------///////
ஏக்கம் கொஞ்சம்
மனவீக்கம் கொஞ்சம்
பொறாமையே உச்சமாய் இருந்தது
அந்தக் கேள்வியில்...
/////////----//////////------///////////----////////----//////////////
கோடி நிலவுகள் கூடிப் பெற்ற
என் பெளர்னமிப் புன்னைகையே!
வாடித் துவழாத
வாசனை மங்காத
என் மாமிசப் பூவே!
உனக்குள் மெழுகாய் உருகி
எனக்குள் சோதி காட்டும்
என் ஒளிச் சுடரே!
//////////-----///////-------////////------/////////-----////////
உனக்கான என் இதய அறைகளில்
முதலிடம் பிடித்த
என் முதல் காதலியை
சொல்கிறேன் கேள்!
//////////-----//////////-----//////////-------////////-----//////
சொல்ல நாவினித்து
கேட்க செவியினித்து
உணர மெய்யினித்து
உலவி வருபவளாம்
//////////----///////////-----/////////------/////////---///////
உலகின் மூத்தவளாம்
இளமை துளிர்பவளாம்
தென்மதுரை தவழ்ந்தவளாம்
செந்தமிழ் எனும் பெயர் கொண்டு
செம்மொழியும் ஆனவளாம்
அவள் தான் என்
"முதல் காதலி" என்றேன்!
/////////------/////////----////////----/////////----///////////
அந்தியை விடவும்
வெட்கிச் சிவந்தாள் என்னவள்
இப்போது இருவருமே
பேச்சு மறந்தோம்
கைத்தலம் பற்றி
சொர்க்கம் புகுந்தோம்!
///////////----//////////-----/////////----/////////----///////
