இன்னும் உச்சி குளிருதடி
சுட்ட கருவாடும், பழஞ்சோறும்,
வெங்காயம், பச்சைமிளகாய்
தொட்டு ஊறுகாய், தின்னும் கனவில்
இன்னும் ஊறுதடி நாவு
பட்ட வெயில் தொட்டு செல்லும்
வயல்க்காற்றின் வரப்பில் - மெல்ல
நடை போடும் கனவில் இன்னும்
சிலிர்க்குதடி மேனி
கொட்டும் அருவியின்
தட்ப அணைப்பில் - மெய்
கலைந்து மூழ்கி எழும்கனவில்
இன்னும் உச்சி குளிருதடி
உழுதவயல் மணமும்
இழையவள் நாற்றின் மணமும்
முற்றிய கதிரின் வெட்டிய மணமும்
தூற்றிய நெல்லின் மணமும்
சூடு மிதிக்கும் இயந்திரமாய் -இன்னும்
சுற்றிக்கொண்டுதான் இருக்குதடி
நிறைந்த முட்டி ஒழுகும் கள்ளில்
நீட்டி நாக்கு சுவைத்த கள்ளத்தனம்
கசப்பில் கலந்த இனிப்பாய்
இன்னும் இனிக்குதடி
குஞ்சுக்கிளி பொந்து தேடி
சுற்றித்திரிந்த காலங்கள்
இன்னும் என் மனக்கூண்டில்
சிக்கித்தவிக்குதடி..
உங்கள் விதுஷன்
