ஒளி காட்டும் வழி
அசுரனாம் நரகன் அழிந்த நாளே
அகத்தில் மகிழ்ச்சி நிறைக்கும் தீபாவளி !
அடர்ந்த இருட்டில் அகல்விளக்கின் ஒளியால்
அகலும் இருளும் வழியும் தெரியும் !
அறிவின் ஒளியால் அகலப் பார்த்தால்
அஞ்ஞான இருளும் முற்றிலும் விலகும் !
அகவொளி பூத்து தவஒளி சிறக்க
அவநெறி அழிந்து சிவநெறி தழைக்கும் !
அவதூறு சுமந்து துடித்த உளத்தில்
அருட்சோதி நிறைய பழிச்சொல் தீரும் !
அழிவுக்கு வித்திடும் அழுக்காறு அகல
அற்புத ஒளியால் இதயம் சிரிக்கும் !
அனலியின் ஒளியால் மலரும் கமலமாய்
அருந்ததி அருளால் கற்பும் சிறக்கும் !
அகண்டம் ஏற்றி அசலன்தாள் பணிய
அண்டத்தில் அமைதி என்றும் நிலைக்கும் !
அகிலம் முழுதும் வன்முறை அடங்கி
அழகுமத்தாப்பின் ஒளியாய் அன்பு பெருகும் !
அசுர குணமும் அரக்க மனமும்
அமைதியின் வடிவாய் மாறியே ஒளிரும் !
அற்புத மகிமை கொண்ட நன்னாளில்
அளவிடற் கரியது ஒளிகாட்டும் வழி ....!!!
