எதைத் தேடி - வினோதன்
ஓய்வுகளில் கூடுகளை
உடைத்து மிதித்தபடி
ஓடிக் கொண்டிருக்கிறோம்,
எங்கென்று தெரியாத
ஏதோ ஓரிடத்திற்கு !
இணையத்தோடு
இணைந்தே இருக்கிறோம்
இதயங்களை மறந்து விட்டு !
கூட்டமாய் இருந்தும்
தனித்தனி தீவுகளாய்,
நாகரிக ஈவுகளாய் !
வயிற்று வேண்டுகோள்
நாவின் விருப்பமாய்
மருவி மருகித் திரிகிறோம் !
நம் வாசல் எட்டாதவரை
யாருடைய மரணமும்
நமை எட்டுவதில்லை !
துக்கம் விற்கிறோம்
தூக்கம் வாங்க
தூரதேசம் போகிறோம் !
மழலை ரசிக்க
மணி போதவில்லை,
காணொளியில் மூழ்குகிறோம் !
வடை தேடும் எலியாக
நிதம் பணம் தேடியோடி
களைத்து களிக்கிறோம் !
நிதானம் விற்றுவிட்டு
நிதர்சனம் மறுத்துவிட்டு
நிகழ்காலம் கொன்றுவிட்டு
வேகமாய் ஓடுகிறோம்...!
எதைத் தேடி ???
