அன்றாடம்

பாவி மனுஷா?
நல்லா இருப்பியா நீ?
கூந்தல் பிடித்து எட்டி உதைபட்டு
மூலையில் விழுந்த அம்மாவின் புலம்பல்..
தெறித்து விழுந்த
நெகிழிப் பையிலிருந்து
அரிசி, பச்சைமிளகாய்
இத்யாதி பொருட்கள் சிதற...
தரையில் கிடக்கும்
நாலுமாத தங்கச்சிப் பாப்பாவின் அழுகை;
லுங்கியை மடித்துக் கட்டி
காலி டப்பாக்களை திறந்து
விசிறியடிக்கும் அப்பா..
எப்படியும்
சாமி படத்துக்குப் பின்னால்
அம்மா வைத்திருக்கும்
காசை கண்டு பிடித்து
மீண்டும் ஒரு உதை கொடுத்து
வெளியே செல்லப் போகிறார்..
போனவுடன் –
குரைத்துக் கொண்டிருக்கும்
சுப்பிரமணி நாய்குட்டி
முந்துவதற்கு முன்னமே
அம்மா கொண்டுவந்த
பையிலிருந்து எகிறி
மண்தரையில் கிடக்கும்
பொட்டலத்திலிருந்து
எட்டிப் பார்க்கும்
அந்த இரண்டு வடைகளை
ஓடிப்போய் எடுத்துக் கொள்ளவேண்டும்..
அப்பாவின் காலடிபட்டு நசுங்காவிட்டால்..
கண்ணில் நீர்தழும்ப
பார்த்து கொண்டிருந்தான்
சின்ன ராசு..