எல்லைக்கோடு

எல்லைக் கோடு

ஆர்ப்பரிக்கும் கடல் அலைகள்
அமைதியாகக் கரையை
முத்தமிடுவதும்
மிதந்து வரும் கப்பல்கள்
தரைத் தட்டி நிற்பதும்
கடல் அலைகள், கப்பலுக்கும்
கடற்கரையே எல்லைக் கோடு !

எல்லைக் கோடு தாண்டினால்
தொல்லைகள் வந்து சேரும்
நாடறிந்த இராம காவியம்
உலகுக்கே உணர வைத்தது
இளையவர் கிழித்தக்கோடு
சீதாபிராட்டிக்கு
எச்சரிக்கை எல்லைக் கோடு !

சுற்றி வரும் கோள்கள்
சுடர் விடும் விண்மீன்கள்
வர்ணஜாலம்
காட்டும் வானவில்
வட்டமிடும் வல்லூறுக்கும்
வானமே எல்லைக் கோடு !

எல்லை மீறும் விளையாட்டு
தொல்லை துயரம் கொடுக்கும்
நாடு நகரம் இழக்க வைக்கும்
இதிகாசம் அன்றே உணர்த்தியது
பாரதப்போரே எடுத்துக் காட்டு !

வளைந்து ஓடும் நதிக்கும்
துள்ளி ஓடும் மீனுக்கும்
நதிக்கரையே எல்லைக் கோடு !

சாலை விபத்தினைத் தவிர்க்க
சாலையில்
காணப்படும் கோடுகளே
வாகன ஓட்டிக்கு எல்லைக் கோடு !
ச ரி க ம ப த நீ.... ஏழுசுரமே
சங்கீதத்துக்கு எல்லைக் கோடு !

‘நாம் இருவர் நமக்கு இருவர்’
நம் வாழ்வுக்கு எல்லைக் கோடு
வகுத்துக் கொண்டு வாழுங்கள்
வாழ்ந்து பாருங்கள்
சுமையான சோகம் கூட
சுகமாகத் தோன்றும் !

காதலுக்குத் திருமணம்
மோதலுக்கு மரணம்
பக்திக்குச் சரணம்
நினைத்துப் பார்த்தால்
மனித வாழ்கையில்
எல்லாமே
எல்லைக் கோடுகள் !