அகம் , புறம் , அறம் --- மரபு கவிதை -- கொச்சகக் கலிப்பா
அகம் , புறம் , அறம் --- மரபு கவிதை -- கொச்சகக் கலிப்பா
அகம் :-
ஐந்திணையும் சேர்ந்திங்கே ஐந்நிலமாய் அகத்தினிலே
செந்தேனாய்த் தித்திக்கும் செந்தமிழர் வாழ்வியலும்
பைந்தமிழில் எடுத்தியம்ப பைம்பொழில்கள் நிழல்தரவே
இந்தாளில் அகவன்பை இன்பமாய்ச் செப்பிடுவேன் !
புறம் :-
புறத்திணைகள் பன்னிரெண்டாம் புவிதனிலே உண்டென்பார்
மறத்தினையும் வீரத்தையும் மங்காது பாதுகாத்தல்
திறமான தீரர்கள் திடமுடனே வழிவந்த
உறவான வெட்சியுடன் உருவாகும் வாகையுமே !
அறம் :-
அறத்தினையும் செய்தலன்றோ ஆளுமைக்கே அழகென்பார்
சிறந்ததொரு கொடைகுணத்தைச் சீராகப் பற்றிடவே
மறந்திடுமா அறநெறிகள் மகத்துவமாய் நின்றிடுமே .
விறலியர்தம் தூதும்தான் விவேகத்தின் அறமன்றோ !
அகம் , புறம் , அகம் - ஒன்றிணைதல் :-
அகத்திணைகள் அன்புடனே அகலாது பேணிடுங்கள்
புகவேண்டும் வீரமான புறத்திணைகள் காலத்தால்
சகத்தினையும் ஆள்வதற்குச் சான்றாகும் அறம்தானே !
யுகத்தினையே வென்றிடலாம் யாவருமே மூன்றாலே !!!
ஆக்கம் :- பைந்தமிழ்ப் பாமணி . சரஸ்வதி பாஸ்கரன்
