மழை

வானம் எழுதும்
கவிதைதான் மழை !

உழவனின் வாழ்வில்
உயிரெழுத்து மழை !
உணர்வுப் பூர்வ காதலரின்
உயிர்மெய் எழுத்தும் மழை !

நிலத்திற்கு
ஒற்றெழுத்து மழை !
நீள் மேகத்தின்
சார்பெழுத்தும் மழை !

நெடும் கடலுக்கு
வெற்றெழுத்து மழை !
நெருப்பிற்கு
முற்றெழுத்தும் மழை !

தோகை மயிலுக்கு
துணை எழுத்து மழை !
தவழும் நதிக்கு
தொடரெழுத்தும் மழை !

விதைக்கும் விதைக்கு
முதல் எழுத்து மழை !
வீதியோர வணிகனுக்கு
வினா எழுத்தும் மழை !





வீறிடும் தவளைக்கு
வினை எழுத்து மழை !
சீறிடும் பாம்பிற்கு
சுட்டெழுத்தும் மழை !

உயர்ந்த அருவிக்கு
புதிர் எழுத்து மழை !
ஊரோர குளத்திற்கு
சித்திர எழுத்தும் மழை !

எத்தனையோ கவிதைகளை
யாராரோ எழுதிடினும்
ஒப்பற்ற மாகவிஞன்
வானம்தான் வையகத்தில். !


ஸ்ரீதரன் வெங்கடகிருஷ்ணன்