குளந்தொட்டுத் தேரை வழிச்சென்றா ரில் - பழமொழி நானூறு 23
நேரிசை வெண்பா
அருமை யுடைய பொருளுடையார் தங்கண்
கரும முடையாரை நாடார் - எருமைமேல்
நாரை துயில்வதியும் ஊர! குளந்தொட்டுத்
தேரை வழிச்சென்றா ரில். 23
- பழமொழி நானூறு
பொருளுரை:
எருமையின் மீது நாரை தூங்குகின்ற மருதநிலத் தலைவனே! குளத்தினைத் தோண்டி அதனிடத்தில் உறைவதற்குத் தேரை இருக்குமிடத்தைத் தேடிச் செல்வார் இலர். அதுபோல, பெறுதற்கு அருமையை உடைய பொருளினை உடையார் தம்மிடம் காரியம் உடையவர்களை தேடுதலிலர்.
கருத்து:
பொருளுடையாரிடம் கருமம் உடையார் தாமே தேடி வருவர்.
விளக்கம்:
குளத்தினைத் தோண்டியவுடன் தேரைகள் தாமே வந்து சேருதல்போல, செல்வமுண்டான அளவிலே கருமம் உடையார் தாமே வந்து சேருவர்.
'குளந்தொட்டுத் தேரைவழிச் சென்றா ரில்' என்பது பழமொழி.
