முற்றப் பகலும் முனியா தினிதோதிக் கற்றலிற் கேட்டலே நன்று – பழமொழி நானூறு 61

நேரிசை வெண்பா

உணற்கினிய இன்னீர் பிறிதுழிஇல் என்னும்
கிணற்றகத்துத் தேரைபோல் ஆகார் – கணக்கினை
முற்றப் பகலும் முனியா தினிதோதிக்
கற்றலிற் கேட்டலே நன்று. 61

– பழமொழி நானூறு

பொருளுரை:

குடித்தற்கு இனிய உவர்ப்பில்லாத நன்னீர் வேறு இடங்களில் இல்லையென்று நினைக்கும் கிணற்றின் உள்ளே வாழும் தவளையைப் போல் தாமும் கருதாமல் நூல்களை நாள் முழுமையும் வெறுப்பின்றி இனிதாகப் படித்து அறிதலைக் காட்டினும் அறிஞர்களிடம் விரும்பிக் கேட்டலே நன்று. (கற்றலிற் கேட்டலே இனிது.)

விளக்கம்: தேரை போல் ஆதலாவது தாம் விரும்பிச் செய்யும் கற்றலினால் அன்றி கேட்டறிதலினால் பயனில்லை என்று கருதுதல்.

தாம் பல நாளும் கற்றறிந்ததில் தளர்வு வந்தபொழுது அறிஞர்கள் சொல்வதைக் கேட்ட கேள்வி ஊன்றுகோல் போல உதவுமாதலின், கேட்டலே நன்று என்றார்.

வருந்திக் கற்றலினும் கேட்டல் மிக இனிது என்பார், 'முற்றப் பகலும் முனியாது இனிதோதிக் கற்றலின்' என்று கற்றலின் அருமையை விளக்கினார்.

கணக்கு - வரையறை. மக்கள் நடத்தவேண்டிய வாழ்க்கையை வரையறை செய்தலின் நூல்கள் கணக்கு என்ற பெயரைப் பெற்றன. கணக்கினை அறிந்தோர் கணக்காயர் எனப்படுவார்.