எச்சில் வாழ்க்கை
வெட்டு குத்து கொலையெல்லாம்
வெட்கமின்றி செய்துவிட்டு
தேசத்தினைச் சுரண்டவேண்டித்
தேர்தலிலே போட்டியிட்டு
கட்டுக் கட்டாய்ப் பணமிரைத்து
கள்ள ஓட்டில் வெற்றி பெற்று
ஓட்டு போட்ட கூட்டத்தினை
ஓட்டாண்டியாய் ஓடவிட்டு
ஊரை அடித்து
உலையில் போட்டு
ஊழல் செய்து
பணமும் சேர்த்து
சாக்கடையாய் ஒரு வாழ்க்கையினை
சங்கடமின்றி வாழ்ந்துவிட்டு
சுத்தமான பொய்கள் கொண்டு
சுயசரிதை எழுதிவிட்டு
மகாத்மா எனும் பெயரெடுக்க
மடத்தனமாய் கனவுகாணும்
மானம் கெட்ட ஜென்மங்களே!
மனிதக் கழிவின் எச்சங்களே!
அரும்பெரும் அரசியலை
அருவெருப்பாய் ஆக்கிவைத்த
ஆடை கட்டிய அசிங்கங்களே!
மிடுக்காய் உலவும் மிருகங்களே!
எச்சில் வாழ்க்கை இதுவென்று
என்றைக்கு உணர்வதாய்த் திட்டம்?
உங்கள் கட்சிக் கொடியின் கம்பம்கூட
உங்களைக் கயவன் என்று திட்டும்!
மனிதத் தன்மை மறந்த நீங்கள்
மலத்தைக் காட்டிலும் மட்டம்!
மக்களின் கால்களில் விழுந்தால்தான்
இனி மன்னிப்பாவது கிட்டும்!
