கணபதியாம் கணபதி ....!!
வெள்ளிக் கொம்பன் கணபதி
வெற்றி தரும் கணபதி
வள்ளி முன்னே வேழமாய்
வடி வெடுத்த கணபதி ....!!
வினை தீர்க்கும் கணபதி
விக்னம் நீக்கும் கணபதி
விதிதனையே மாற்றி - வீடு
பேறளிக்கும் கணபதி ...!!
அருகம் புல்லை சூட்டினால்
அல்லல் போக்கும் கணபதி
அவ்வை பாட்டி அகவலால்
அகம் பூக்கும் கணபதி ....!!
தந்தம் கொண்டு பாரதம்
எழுதிய தொந்தி கணபதி
சந்தம் கொண்டு பாடவே
சிந்தை மகிழும் கணபதி ....!!
அன்னை தந்தை சுற்றியே - மாங்
கனி வென்ற கணபதி
அன்பாய் உருகி அழைத்தால்
ஓடி வருவான் கணபதி ....!!
சதுர்த்தி விரதம் இருந்தால்
சங்கடம் போக்கும் கணபதி
சகல தோஷம் நீக்கிடும்
சக்தி யுள்ள கணபதி ....!!
பாவங்களைப் போக்கிடும்
பஞ்சமுக கணபதி - திருப்
பாதங்களை பற்றியே
பணிந்திடுவோம் கணபதி .....!!!
