உழைத்திடு உயர்ந்திட

இரா. சுவாமிநாதன்

இந்திய நாட்டின் இளைஞனே,
எதிர்காலத்தைச் செதுக்கும் சிற்பியே
நிகழ்காலத்தை எப்படிச் சமைக்கின்றாய்
நினைத்துப் பார்த்திடு ஒருநொடி.

பெற்றவர் பேச்சைக் கேளாமல்
இருப்பதில் வருமோ ஓர்இன்பம்
கற்றவர் காற்றவர் தமைத்தானே
நட்புடன் நாடிச் சென்றிடுவார்.
மானிடர் எவரும் நம் மனத்தின்
மதிப்பினைப் பெறலே முறையாகும்.
இன்னல் தரும்வழி கூறிடுவார்
இனிப்பாய்ப் பேசிக் கெடுப்பவரே.
இணக்கம் எவருடன் கொண்டிடுவாய்
உன்நிலை உயர்த்திடும் நபரிடமே.

இனங்கள் பலவாம் உயிரினத்தில்
ஓரினம் தம்மினம் சேர்ந்திருக்கும்.
பசுஒன்று பன்றியை நட்பித்தால்
பாவம் அதுவும் கெட்டுவிடும்.
நம்மிடைக் கற்றவர் பலருள்ளார்
நாமவர் நட்புக் கொண்டிருந்தால்
எள்ளள வேனும் உயர்வன்றோ
ஒவ்வொரு நொடியும் நமைச்சேரும்.
கல்லார் பொல்லார் உமை ஆண்டால்
களிமண் ஆகும் உன்அறிவும்.

கற்றது பிறரும் பயனுறவே
கற்றதன் படிநாம் நடந்திடவே.
மூத்தவர் மதிப்பிற் குரியவரே
முறைதான் அவரை மதிப்பதுவே.
ஒன்றும் அறியார் பிடிவாதம்
உடைத்திடும் சேர்ந்தோர் மனங்களையே.

இன்னல் தருவது எளிய செயல்
இழிபெயர் பெறுவதும் அரிதல்ல.
எதையும் நொடியில் அழித்திடலாம்
எதற்கிங்கு அழிவினைத் தேடுவது?
ஆக்கம் தருகின்ற செயல்களன்றோ
உழைப்பின் பயனாய் உருவாகும்.
செயலில் இழிநிலை சேர்த்திருப்போர்
எதையும் செய்ய இடம் கொடுப்பார்.

அந்நிலை அடைந்தவர் எந்நாளும்
அவருடன் சேர்ந்தவர் மனமறியார்.
அதிசயம் அவர்கள் திருந்துவது;
அத்தி பூக்கின்ற செயலாகும்.
இடைநிலை இருப்போர் உய்திடவே
உணர்ந்தால் நல்வழி உண்டாகும்.
இடைநிலை பாதி கெட்டமையாம்!

ஒருபுறம் முழுக்கேடு கடல் இருக்க
மறுபுறம் நல்வழிச் சாரலுண்டு.
முழுக்கேடுக் கடலில் விழநினைந்தால்
நினக்குமுன் அவருடல் மிதந்திருக்கும்;
உணருமுன் பாதாளம் சென்றுவிடும்.

அவ்வழி சென்றபின் உய்வில்லை
அவர்கதை அத்துடன் முடிந்துவிடும்.
நல்வழிச் சாரலில் சோதனைகள்
நடந்து நடந்து சென்றாலும்
சேருமிடம் வந்து சேராது.
சேர்ந்திடும் சோர்வு வழிதனிலே
சிந்தனைச் சாறு தரும் ஊக்கம்
சோர்வினைத் தூர ஓட்டிடுமே.
நலவழிச் சாரலைக் கடந்த பின்னே
விரிந்து பரந்த நல்லுலகம்.
எல்லைகள் இல்லா வாழ்க்கையிது.
உழைத்தால் உயர்வு மலர்ந்திடுமே.
உழைக்க உழைக்க உயர்வொன்றே
இமயம் போல உயர்ந்து வரும்.

உழைப்பிலும் களைப்பிலும் இன்பங்கள்
உதவிடும் போதும் கூடவரும்.
உழைத்திடு உயர்ந்திடு உதவிடு
உலகில் சிறந்து வாழ்ந்திடு.
(1980)