தீபாவளி—தீபாவமழி
தீபாவளி—தீபாவமழி!
தீபங்கள் ஒளியங்கு தெரியட்டுமே!
தீபாவம் அழியென்று எரியட்டுமே!
தீபாவளி சுடரெங்கும் விரியட்டுமே!
தீபாவம் வலிமங்கி முறியட்டுமே!?
தர்மங்கள் பிழைத்திங்கு வாழட்டுமே
கர்மங்கள் தழைத்திங்கு ஆளட்டுமே!
வர்மங்கள் கலைந்திங்கு ஓயட்டுமே!
துர்மங்கள் தொலைந்திங்கு மாயட்டுமே!
இனம்சேரா நாய்க்குணம் தீரட்டுமே!
குணம்மாறா மனிதமனம் சேரட்டுமே!
பணம்காக்கும் பேய்க்குணம் மடியட்டுமே!
மனம்பூக்கும் புனிதகணம் விடியட்டுமே!
மனிதராய் வாழும்நலம் பழகட்டுமே!
மனம்பயின்று தேறிபயம் விலகட்டுமே!
வனவிலங்காய் தேடும்பகை ஒழியட்டுமே!
இனவொழுங்காய் கூடும்தகை நிலவட்டுமே!
நீதியென்ன மன்றமென்ன புரியட்டுமே!
மீதியென்ன மேன்மையென்ன அறியட்டுமே!
சாதியென்ன ஆதியென்ன தெளியட்டுமே!
வாதியென்ன வஞ்சமென்ன ஒழியட்டுமே!
கத்தியென்ன புத்தியென்ன தீட்டட்டுமே!
உத்தியென்ன உண்மையென்ன மீட்டட்டுமே!
வெற்றியென்ன தோல்வியென்ன ஈட்டட்டுமே!
முற்றியென்ன மீட்சியென்ன காட்டட்டுமே!
அறிவென்ன ஆக்கமென்ன விளங்கட்டுமே!
நெறியென்ன நேரென்ன துலங்கட்டுமே!
அன்பென்ன அமைதியென்ன உணரட்டுமே!
பண்பென்ன பாசமென்ன மலரேட்டுமே!
கோபமென்ன தேவையென்ன வெடிக்கட்டுமே!
பாவமென்ன சேவையென்ன படிக்கட்டுமே!
யோகமென்ன மோகமென்ன தேறட்டுமே!
தேகமென்ன தாகமென்ன மீறட்டுமே!
ஆசையென்ன மோசமென்ன தேயட்டுமே!
நீசமென்ன நாசமென்ன தீயட்டுமே!
வாசமென்ன வாழ்வதென்ன நினையட்டுமே!
நேசமென்ன நிலைப்பதென்ன முனையட்டுமே!
நாளென்ன விழாவென்ன ஆயட்டுமே!
நமக்கென்ன நலமென்ன தேடட்டுமே!
பாடமென்ன கூறுமென்ன படிக்கட்டுமே!
படிப்பென்ன புரிவென்ன நடக்கட்டுமே!
பாசமென்ன நேசமென்ன மலரட்டுமே!
பண்பென்ன அன்பென்ன வளரட்டுமே!
ஈகைஎன்ன இரக்கமென்ன புலரட்டுமே!
இயல்பென்ன தயவென்ன ஒளிரட்டுமே
கொ.பெ.பி.அய்யா.
