இந்தியத்தாயின் மகுடம்

குடியரசு தின நாள்...
ஆயிரத்து தொள்ளாயிரத்து நாற்பத்தேழில்
பிறந்த சுதந்திரக் குழந்தை
ஆயிரத்து தொள்ளாயிரத்து ஐம்பதில்
சுயமாய்த் தானே நின்று
நிமிர்ந்த நன்னாள்...

பிரிட்டிஷ் மகுடம் இறங்கியது
ஆயிரத்து தொள்ளாயிரத்து
நாற்பத்து ஏழில்...
இந்திய அன்னை மகுடம்
சூடிக்கொண்டாள்
ஆயிரத்து தொள்ளாயிரத்து ஐம்பதின் ஆரம்பத்தில்..

பண்பாடு கலாச்சாரம்
இவற்றில் பல்லாயிரம்
ஆண்டுகளுக்கு முன்பே
வல்லரசான இந்தியா
ராணுவ பலத்திலும்
பொருளாதார வளர்ச்சியிலும்
வல்லரசு நிலை காணும்
அளவுகோலைத் தொட்டுத்
தாண்டும் நிலையை
நெருங்கும் நாள்
இந்த குடியரசு தினநாள்...

மகாத்மா காந்தி
ஜவஹர்லால் நேரு
சுபாஷ் சந்திரபோஸ்
வல்லபாய் பட்டேல்
அம்பேத்கார்
வீரபாண்டிய கட்டபொம்மன்
மகாகவி பாரதியார்
கப்பலோட்டிய தமிழர் வஉசி
வீரன் வாஞ்சிநாதன்
இன்னும் எண்ணற்ற
தலைவர்கள் விடுதலை வீரர்களின்
வீரதீரங்கள் தியாகங்கள்
ஒவ்வொரு இந்திய மனதிலும்
வந்து போகட்டும்...
வேற்றுமை உணர்வுகள் அதில்
வெந்து போகட்டும்...

அறுபத்தொன்பதாவது
குடியரசுத் திருநாள்... இன்று
இந்தியா மிளிர்கிறது
ஒளிரவும் செய்கிறது...
குடியரசு தின நாள்...
இது கணக்கு தீர்க்கும்
நாளல்ல...
கணக்கு பார்க்கும் நாள்...

ஆயிரத்து தொள்ளாயிரத்து
ஐம்பதில் இந்தியா
குடியரசாகியது...
ஒட்டுமொத்த தேசம்
தன்னைத்தானே அழகு
படுத்திக் கொண்டது...

முப்பது கோடி முகமுடையாள்
எனப்பாடிய பாரதியார்
தனியொருவனுக்கு உணவில்லையெனில்
ஜகத்தினை அழித்திடுவோம்
என்றும் பாடினார்...
நூற்று முப்பது கோடி மக்கள்தொகை
தாண்டியும் இந்தியா
உணவுப் பொருள் உற்பத்தியில்
பெற்றுள்ளது தன்னிறைவு..
இதில் தெரிகிறது
இந்தியாவின் மகிழ்ச்சி...
இதன் பின்னால் இருக்கிறது
விவசாய வளர்ச்சி
தொழில்நுட்பப் புரட்சி...

விவசாயம்
உணவுப்பொருள் பதனிடுதல்
ஆகியவற்றில் வளரட்டும் இந்தியா...

கல்வி சுகாதாரத்தில்
இன்னும் வளர்ச்சி
காணட்டும் இந்தியா...

மின் உற்பத்தியில்
தன்னிறைவடையட்டும்
தன்னிகரில்லா இந்தியா...

தகவல் தொழில்நுட்பம்
கணினிப் பொறியியல்
தொழில்கள் தொழிற்சாலைகளில்
பலம் பெறட்டும்
பண்பாடு சிறந்த இந்தியா...

ராணுவ பலத்தில்
விஞ்ஞான வளர்ச்சியில்
வானமே எல்லையாகட்டும்...
அனுப்பிய முதல் முறையிலேயே
செவ்வாய்க் கிரகத்தின்
உயரம் தொட்ட
செயற்கைக்கோள் இந்தியாவினுடையது...
இந்தியா இதற்கு மேலும்
உயரமுடையது...

எல்லா துறைகளிலும் இந்தியா
இந்நிலை அடையும்
தொலைவு அதிகமில்லை...
இந்தியா ஒரு வல்லரசு
என ஒவ்வொரு இந்தியனும்
பெருமிதம் கொள்ளும்
நாட்களும் நிறைய இல்லை...

இந்தியர் ஒவ்வொருவரின்
பங்களிப்பில் இருக்கிறது
வல்லரசு இந்தியா...
அதில்தான் இருக்கிறது
இந்தியர் ஒவ்வொருவரும்
உலக அளவில்
பெருமை கொள்ளும்
ஈடு இணையில்லா
வலிமையான ஒளிபடைத்த
நல்லரசு இந்தியா...

அனைவருக்கும்
குடியரசு தின நாள்
நல் வாழ்த்துக்கள்...

அன்புடன்...
ஆர். சுந்தரராஜன்...
👍🙋🏻‍♂🙏