மருத்துவ வெண்பா – கொட்டிக் கிழங்கு - பாடல் 59

நேரிசை வெண்பா

கொட்டிக் கிழங்கு குளிர்ச்சியென்பார் தேமலுடன்
ஒட்டிநின்ற மேகம் ஒழிக்குங்காண் – வட்டமுலை
மானே! அகக்கடுப்பும் வந்தவழ லுந்தணிக்குந்
தானே யிதையறிந்து சாற்று. 59

- மருத்துவ குணபாடம்

குணம்:

கொட்டிக் கிழங்கு தேமல், தேகக்கடுப்பு, உட்சூடு ஆகியவைகளை நீக்கும். இதனைக் குளிர்ச்சி என்பர்.

உபயோகிக்கும் முறை:

இக்கிழங்கை நீரில் போட்டு வேக வைத்து மேல் தோலை நீக்கி உண்ணலாம். இதனால் தேக வெப்பம் போகும். இக்கிழங்கை உப்பிட்டு வேக வைத்து மேல் தோலை நீக்கி உலர்த்தி நெய்யில் பொரித்தும் உண்ணலாம். இது நாவிற்கு ருசியையும், தேக ஆரோக்கியத்தையும் உண்டாக்கும்.