நல்வினை நீக்கும் படை மூன்று - திரிகடுகம் 95
நேரிசை வெண்பா
அறிவழுங்கத் தின்னும் பசிநோயும் மாந்தர்
செறிவழுங்கத் தோன்றும் விழைவும் - செறுநரின்
வெவ்வுரை நோனா வெகுள்வும் இவைமூன்றும்
நல்வினை நீக்கும் படை 95
- திரிகடுகம்
பொருளுரை:
நல்லறிவு கெடும்படி வருத்துகின்ற பசியாகிய நோயும்,
நல்லோர் நெருங்குதல் கெடும்படி உண்டாகும் விருப்பமும்,
பகைவரிடத்துண்டாகும் கொடிய மொழிகளை பொறுக்காத கோபமும் ஆகிய இந்த மூன்றும் நல்ல வினையை நீக்குகின்ற படைக் கருவிகளாம்.
கருத்துரை:
கொடும் பசியாலும், பெருவிருப்பாலும், கொடுமொழி பொறுக்காத கோபத்தாலும் அறமுறை கெடும் என்பது.
வெவ்வுரை: வெம்மை + உரை.
