படகு ஒன்றில்
பயணிப்போம்
இருவர் மட்டும்
நீயின்றி நானில்லை
நானின்றி நீயில்லை
வாக்குறுதிகளோடு
படகின் அம்முனையில் நீ
படகின் இம்முனையில் நான்
இருவரும் பிரிந்து தொலைவில்
இல்லையேல்
இருவரும் ஒன்றாக நடுவில்
இணைந்தே
இருந்தால் இருப்போம் இறக்காமல்
பிரிந்தும்
இருந்தால் இருப்போம் இறக்காமல்
அந்தப் பக்கம் இருவரும் சென்றாலும்
இந்தப் பக்கம் இருவரும் சென்றாலும்
படகு கவிழும்
உயிரும் பிரியும்
உறவும் முறியும்
நீரற்ற பாதையில் படகு செல்லாது
நீயற்ற பாதையில் நான் செல்லமாட்டேன்
படகு என்பது வாழ்க்கை
நீரென்பது அன்பு
நீயாக நீயிருந்து
நானாக நானிருந்து
நாமாக நாமிருந்து
இருவரும் ஒருவரை ஒருவர் புரிந்து
புரிந்ததால் சுயத்தை தொலைத்து
பிடிக்காதவற்றை ஏற்று
பிடித்தவற்றை தொலைத்து
உனக்குப் பிடித்ததை எனக்காகவும்
எனக்குப் பிடித்ததை உனக்காகவும்
விட்டுக்கொடுப்போம்
விருப்பங்களை தொலைப்போம்
ஒன்றாக வாழ்வோம்
மனம் ஒன்றாதவைகளோடு
மனதை பழக்குவோம்
பழக்கம் நடைமுறையாகிவிடும்
நீயும் நானும் இருப்போம்
நீயாக நானாக தனித்து
நாம் தொலைந்திருப்போம்
முடிவுக்காக காத்திருப்போம்
ஏதாவது ஒன்றினால் பிணைக்கப்பட்டு
முடிவையும் தொலைத்திருப்போம்
இணைந்திருப்போம் பிரிந்தேயிருப்போம்
பிரியவுமுடியாமல் பிரியமுமில்லாமல்
எங்கே தொலைந்தோமென்பது
தெரியாமல் படகும் கவிழ்ந்தது அறியாமல்
நீரற்ற பாதையில் பயணிப்போம்
நீயற்ற பாதையில் பயணிப்பேன்
நம் வாக்குறுதிகளை எங்கே தொலைத்தோம்
எங்கே நாம் காணாமல் போனோம்
எப்போது நான் நீ என்ற வேறானோம்
நினைத்துப்பார்…