எண்ணம்

(Eluthu Ennam)


எண்ணம் சமர்ப்பிக்க Login செய்யவும்.


​கிரிக்கெட் போட்டியும் இந்திய ஒருமைப்பாடும் 

--------------------------------------------------------​

​நேற்று(09.06.019) நடைபெற்ற உலக அளவிலான கிரிக்கெட் போட்டியில் இந்தியாவும் , ஆஸ்திரேலியாவும் மோதியதும்  அதில் இந்தியா வெற்றிபெற்றதும் நாம் அனைவரும் அறிந்ததே. ​உண்மையில் நமது அணி வீரர்கள் மிகவும் ஈடுபாடுடன் அக்கறையுடன் முழுமூச்சோடு வெற்றியை இலக்காக வைத்து விளையாடியது பாராட்டத்தக்கது . இந்திய அணிக்கு என் வாழ்த்துகள் ஒரு இந்தியன் என்ற முறையில் மட்டுமல்லாது ஒரு ரசிகனாகவும் . 


​ஆனால் நான் கூற வந்தது அதுவல்ல , அந்த இறுதி கட்டத்தில் , கடைசி அரைமணி நேரத்தில் உலகத்தில் உள்ள அனைத்து இந்தியனும் , தேசப்பற்றோடு , தாய்நாட்டு உணர்வோடு மிகவும் பதட்டமாக ​இருந்தார்கள் என்பதை மறுக்க முடியாது . அதுதான் நமது நாட்டின் ஒருமித்த எண்ணமும் , என்றும் நிலைத்த , மக்களின் மனங்களில் ஆழமாக ஊன்றியுள்ள தேசிய உணர்வுதான் காரணம் என்பதில் இருவேறு கருத்து இருக்க முடியாது . அதற்காக நான் ஒரு இந்தியன் என்பதில் பெருமிதம் கொள்கிறேன் .அனைத்து இந்திய உள்ளங்களுக்கும் தலைவணங்குகிறேன் . இது உலகிற்கு நாம் காட்டும் ஓங்கிய ஒற்றுமை உணர்வு . 

அதேநேரத்தில் , நமது நாட்டிற்குள் பல விஷயங்களில் , குறிப்பாக தேர்தல் களங்களில் மற்றும் காதல் திருமணங்களில் , மேலும் பண்டிகை அல்லது விழாக்களில் மட்டும் ஏன் சாதி, சமயம் என்று பிரித்துப் பார்க்கிறோம் . அதைவைத்து பிரிந்து கிடக்கிறோம் .சாதி மதங்களை வைத்து நமக்குள் பகையை உருவாக்கி வளர்க்கிறோம் ? அரசியலில் அது விஸ்வரூபம் எடுக்கிறது என்பதை மறுப்பதற்கில்லை . அது ஓட்டு வங்கிக்காகவும் , சுயநலத்திற்காகவும் , பதவி வெறிக்காகவும் என்பது உண்மை . ஆனால் ஒரு சிலரின் தனிப்பட்ட வாழ்விலும் , குடும்பத்திலும் , போலி கௌவரவத்திற்காகவும் மட்டுமே அதை பயன்படுத்துவது ஏற்க முடியாது.   


நிரந்திரமில்லா வாழ்க்கையில் , முடிவறியா இறுதிநாள் வரை அவரவர் இந்த சாதி மதத்தை மறந்து , ஒரு மனிதனாக வாழ முடியாதசமுதாயம் தான் இங்கே உச்சத்தில் இருக்கிறது . இந்த கிரிக்கெட் போட்டியை ஒரு உதாரணமாக வைத்து நாம் அனைவரும் இந்தியர் எனபதை மனதில் கொண்டு வாழ கற்றுக் கொள்ள வேண்டும் . எந்த  ஒரு கட்சியும் ஆட்சியும் குறிப்பிட்ட சாதியையோ மதத்தையோ குறிவைக்கவும் , அதுவே கொள்கையாகவும் இருக்கக் கூடாது என்பது எனது கருத்து. 

அது இந்திய ஒருமைப்பாட்டிற்கு மிகவும் கேடு விளைவிக்கும் என்பதை புரிந்து கொள்ள வேண்டும் . அதேபோல் அவரவர் தமது தாய்மொழிப் பற்றும் எள்ளளவும் குறைதல் கூடாது .

​​    
  பழனி குமார்               

மேலும்


தேர்தல் வைரஸ் 
--------------------------------

நாட்டில் அரசியல் எனும் தீவிர காய்ச்சல் தேர்தல் என்கிற வைரஸ் மூலம் பற்றிக் கொண்டது. எங்கும் இதே பேச்சு தான். மக்கள் மத்தியில் மட்டுமன்றி நாளிதழ்களில் ஊடகங்களில் சமுக வலைதளங்களில் அனைத்தும் இதுதான் இன்றைய பிரதானமாக திகழ்கிறது. அந்தக் காலத்தில் மரத்தடியில் டீக்கடையில் வீதிகளில் என்ற நிலை மாறி இன்று வளர்ச்சி அடைந்து செல்போன், பேஸ்புக், வாட்ஸ் அப்பில் என பல பரிமாணங்களில் பலவிதமான நடைகளில் பரவி வருகிறது.தேர்தலில் பல கட்சிகள் தனித்து அல்லது கூட்டணியில் மக்களை சந்திக்க தயாராகிறது. ஆட்சி மாற்றம் வந்தால் காட்சி மாறும்... ஆனாலும் மக்களுக்கு ஒன்றும் பெரிய மாற்றம் அவர்கள் வாழ்வில் மாறுவதாக தெரியவில்லை இதுவரை கடந்து காலத்தின் நிகழ்வுகளை வைத்து பார்க்கும் போது. 

ஒவ்வொரு கட்சியும் அளிக்கும் தேர்தல் வாக்குறுதிகளை யாரும் முழுமையாக நிறைவேற்றுவது இல்லை. எவரும் மறுக்க முடியாது. ஓட்டு போடும் நாமும் அதைப் பற்றி அவ்வளவாக நினைப்பது இல்லை. கவலையும் கொள்வதில்லை. நம்மிடம் பல ஆண்டுகளாக ஊறிப்போன உண்மை இது.ஏன் நாம் சிந்திப்பதே இல்லை., நமக்கும் நாட்டிற்கும் யார் நன்மையை செய்தார்கள் மற்றும் செய்வார்கள் என்று அலசி ஆராய்ந்து வாக்களிக்க வேண்டும்.மேலும் பலரும் பணத்தை வாங்கி தமது ஒரே உரிமையை ஒட்டுக்கு விலையாக நினைத்து தவறான முடிவுடன் வாக்களிப்பதால் எந்த அளவுக்கு நாம் பாதிப்புக்கு உள்ளாகி நாடும் சீரழிகிறது என்பதை நினைத்து பார்க்க வேண்டும்

.இன்னும் பல இடங்களில் அடிப்படை வசதிகள் கூட எதுவும் இல்லாத நிலைதான். அதைவிட முக்கியமாக நாம் எதையும் எளிதில் மறந்து விடுகிறோம். அதுவே அரசியல்வாதிகளுக்கு கூடுதல் வாய்ப்பாக ஆகிவிட்டது.சிந்தியுங்கள்...இதை நான் அழுத்தமாக கூறினாலும் எப்படி கங்கை எப்போதும் சுத்தமாகாதோ, நதிகள் இணைப்பு திட்டமும் நிறைவேறாதோ அப்படித்தான் எனது விழைவும் விழலுக்கு இறைத்த நீராக ஓடி விடுகிறது.


பழனி குமார் 
21.02.2019

மேலும்

  வாழ்க்கைப் பாடம் 3
********************

நாம் ஒவ்வொருவரும் வாழ்கின்ற ஒவ்வொரு மணித்துளியும் மிகவும் முக்கியமானது. நம்மை கடந்து செல்லும் நேரமும் நாளும் நிச்சயம் மீண்டும் திரும்பி வராது. அந்தத் தருணங்கள் திரும்ப கிடைக்காது. ஆகவே அந்த அரியதொரு பொழுதுகளை வாய்ப்புகளை மிகவும் சிறப்பாக நல்ல முறையில் சீராக பயன்படுத்தி கொள்ள வேண்டும். அவை நமக்கு மட்டுமே பலன் தருபவையாக இருத்தல் கூடாது. மற்றவர்களுக்கும் பயனளிக்கும் வகையில் அமைந்திடல் அவசியம். 
அதன்மூலமாக இந்த சமுதாயம் பலன் பெற வேண்டும். 

பொதுவாக கூறுவது வழக்கம்... இன்று இருப்பவர் நாளை இல்லை என்று. ஆனால் இன்றைய காலகட்டத்தில் நடப்பவை யாவும் பார்க்கும்போது இந்நொடியில் இருப்பவர் அடுத்த நொடியில் என்ன நிலையில் என்று நினைக்கத் தோன்றுகிறது. நாம் வாழும் காலத்தில் நம்மை பற்றி யாரும் பேசாவிடினும், நமது மறைவிற்கு பின் நம்மை பற்றியும் நமது செயலைப் பற்றியும் பேசுகின்ற அளவுக்கு நமது தடங்கள் இந்த மண்ணில் மற்றவர்கள் மனதில் பதிந்திடுமளவு இருத்தல் வேண்டும். 

வரலாற்று நாயகர் என்று கூறுமளவு முடியாவிட்டாலும் வாழ்ந்துக் காட்டியவர் என்று இந்த சமூகம் நினைக்கும் அளவிற்கு வாழ முயற்சிக்க வேண்டும் என்பது எனது கருத்து. 

பழனி குமார் 
09.11.2018   

மேலும்

 நாடும் நடப்பும் 
--------------------------
கடந்த சில மாதங்களாக நாட்டில் பல விசித்திரங்களும், நடைமுறை மாற்றங்களும்,கேலிக்குரிய நிகழ்வுகளும் , அநாகரீக செயல்களும் , தரக்குறைவான மேடை பேச்சுக்களும் அரங்கேறி வருகிறது .இது ஒரு அவலமான நிலை என்றே கூறலாம் . மக்களை மக்கள் மதித்த காலத்தில் வாழ்ந்து , இன்று மனிதம் தொலைத்த மக்கள் வாழும் காலத்தில் வாழ்வது மிகுந்த வேதனையை அளிக்கிறது .
இதற்கிடையே விதவிதமான வழக்குகளும் , வியப்பும் விநோதமும் நிறைந்த தீர்ப்புகளும் அதற்கு எதிர்ப்பாக எழுகின்ற வினாக்களும் சாதகமான பதில்களும் பாதகம் விளைவிக்கக்கூடிய கருத்துக்களும் உலா வருகின்றன .சர்ச்சைகளுக்கும் குறைவில்லை சமரசம் அடையா மனங்களும் குறையவில்லை .சாதிமத வெறியும் வளர்ந்து பரவுகிறதே தவிர அடியோடு அழியவில்லை .மெஞ்ஞானப் போர்வையில் நடந்திடும் அஞ்ஞானங்கள் , அரசியல் சாயமுடன் பகையும் காழ்ப்புணர்ச்சியும் படர்வது நிற்கவில்லை .இதன் முடிவு வருங்கால தலைமுறையை பாதிக்கும் என்று எவரும் நினைப்பதும் இல்லை .மக்கள் நலனுக்காக பணியாற்ற வேண்டிய அரசுகள் , ஆட்சியாளர்கள், இங்கும் அங்கும் தங்கள் சொந்த நலனை மட்டுமே பார்க்கிறார்கள் .
சுயநலம் சுனாமியாய் தாக்குகிறது அதனால் பொதுநலம் போர்வைக்குள் முடங்கிக் கிடக்கிறது .முதலாளித்துவம் உழைக்கும் தொழிலாளி வர்க்கத்தை நசுக்கப் பார்க்கிறது .ஆத்திகர்கள் மட்டுமே அலையலையாய் செல்வதாக கூறிடும் ஆலயங்களில் வழிபடும் சிலைகளையே காணவில்லை .ஏற்கனவே இருந்த உண்மை சிலைகளுக்கு பதிலாக போலி சிலைகள் இருப்பதாக செய்திகள் வருகிறது. பலரின் வேடங்கள் கலைந்து உண்மை உருவங்கள் வெளிப்படுகிறது .எதிர்காலத்தில் என்ன எஞ்சியிருக்கும் என்று தெரியவில்லை .

விடையறியா வினாக்கள் ,முடிவடையா முடிவுகள் ,வேதனை தரும் நிகழ்சசிகள் ,ஆழ் கிணற்றின் அடிமட்டத்தில் வாழும் மக்கள் , அடிப்படை வசதிகள் இல்லாத நிலையில் இருக்கும் சமுதாயம் , நாதியற்ற நிலையில் இருக்கும் நடுத்தரக் குடும்பங்கள், இழித்து பேசப்படும் இருட்டில் வாழும் கூட்டம் இவர்களின் நிலை என்றுதான் மாறும் ?

எப்போதும் கேள்விக்குறிதான் மிஞ்சுகிறது இறுதியில் ! வாழ்ந்த காலமே மேல் என்ற மனநிலைதான் என்னைப் போன்றவர்களுக்கு இருக்கிறது .


 பழனி குமார் 
              



         

மேலும்

காவிரி தீர்ப்பு முடிவா ...தொடக்கமா ?
------------------------------------------------------------

பல ஆண்டுகளாக நடந்து வந்த உரிமைப்போர் சட்டத்தின் மூலமாக வழக்குகளின் வழியாக அது சரியோ ,தவறோ அல்லது குறை நிறை உள்ளதோ ஒரு முடிவுக்கு வந்துவிட்டது .இந்த விவகாரத்தில் இனியும் ஒருவரை ஒருவர் 
தாக்கிக்கொள்ளவோ ,அவதூறுகள் பேசிடவோ ,அறவழிப் போராட்டங்கள் நடத்தவோ நிச்சயம் நடைபெறாது என்றே நினைக்கிறேன் .காலம் ஒன்றே பதில் கூற முடியும் .மேலும் இதுவே முடிவின் முடிவா அல்லது மாற்றத்தின் தொடக்கமா என்றும் தெரியாது .அதை மக்கள்தான் தீர்மானிக்க வேண்டும் .

காரணம் இந்த ஒரு பிரச்சினையோடு நமது வாழ்க்கை ,ஏன் தமிழ்நாட்டின் நிலையே மாற்றம் அடையும் என்று கூறுவதற்கில்லை .முற்றுப்பெறாத பல்வேறு பிரச்சினைகளும் தெளிவு கிடைக்காத பல குழப்பங்களும் இன்னும் இருக்கவே 
செய்கின்றன என்பதை மறுப்பதற்கில்லை தொலைக்காட்சிகளில் விவாதங்களில் வேண்டுமானால் இனி இந்த தலைப்பு வராமல் இருக்கலாம் .மேலும் நமது மக்கள் எதையும் எளிதில் மறந்துவிட கூடியவர்கள் .மாற்றுக கருத்து இல்லை .இந்த தீர்ப்பால் நாளையே காவிரி நீர் விரைந்து வந்து நம் எல்லையைத் தொட்டு பாய்ந்து ஓடி விவசாயிகளை விவசாயத்தை நாளை மறுநாளே வாழவைக்கும் என்றும் கூறமுடியாது. ஆனாலும் இந்த செய்தி ஒரு ஆறுதல் அளிக்கும் ஏதோ ஒரு வகையில் நிச்சயம் .

இனி அடுத்தகட்டப் போர் துவங்கும் கட்சிகளின் இடையே ....இதை யார் கொண்டு வந்தது யாரால் பெற்றோம் என்று அவரவர் தன்னைத்தானே காரணமும் கூறுவார் .அது வர உள்ள தேர்தலுக்காக பிரச்சார உத்தியே தவிர வேறல்ல .வருக வருக விரைந்து வருக காவிரிப் பெண்ணே !

விவசாயிகளின் முகம் மலர்ந்தால்தான் வாழ்கின்ற அனைவரின் அகமும் குளிரும் வயிறும் நிறையும் பஞ்சமும் வஞ்சமும் வாழ வழியின்றி தமிழ்நாட்டைவிட்டு விலகி ஓடும் .கடந்ததும் நடந்ததும் பாடமே தமிழக மக்களுக்கு . இனி யார் தேவையில்லை என்பதையும் யார் தேவை என்பதையும் தீர்மானிப்பார்கள் என்று நம்புகிறேன் .

அதுமட்டுமல்ல ,இனி தமிழ்நாட்டை யார் ஆளப்போகிறார்கள் என்பதைவிட நாம் இனி அடுத்து யாரின் கீழ் வாழப்போகிறோம் என்பது சிந்தித்து முடிவு எடுக்க வேண்டிய ஒன்றாகும் .நம்மால் யார் என்பதைவிட நமக்காக யார் என்பதை சிந்தியுங்கள் நல்ல முடிவு எடுங்கள் .

வரும்தலைமுறை வாழ வேண்டும் குறைகள் ஏதுமின்றி .

பழனி குமார்  

மேலும்

மிக்க நன்றி வேலாயுதம் அவர்களுக்கு .உண்மைதான் ஐயா கலாம் கண்ட கனவுகள் அனைத்தும் நனவாக வேண்டும் . 31-May-2018 6:56 am
சென்ற வாரத்தின் சிறந்த படைப்புகளின் தொகுப்பு ஒரு பார்வை - எழுத்து.காம் :-தங்கள் போற்றுதற்குரிய படைப்பு தேர்ந்தெடுத்த எழுத்து தள குழுவினருக்கும் பாராட்டுக்கள் காவேரி அன்னை பொங்கி எழுந்து வர தமிழ் அன்னை கங்கை அன்னை அருளை வேண்டுகிறேன் அன்றும் இன்றும் தமிழகம் கண்ட கனவு நிறைவேற பாடுபடுவோம் அரசியல் திருவிளையாடல்களை கண்டு மனம் வருந்துகிறேன் கலாம் கண்ட நதி நீர் இணைப்பே சிறந்த தீர்வு என நம்புகிறேன் 31-May-2018 2:27 am
நம் அரசியல் மாற்றங்களை சொன்னேன் பழனிக்குமார் தவறாக எண்ணிவிடாதீர்கள் வாழ்த்துக்கள் 20-May-2018 2:02 pm
நான் அப்படி என்ன மாற்றி செய்தேன் .சொல்லிலும் செயலிலும் ?எந்த தவறாகினும் கூறுங்கள் பரவாயில்லை திருத்திக்கொள்ள முயற்சிக்கிறேன் சகோ 20-May-2018 1:58 pm

  புறப்பட்டார் மோடி: இங்கிலாந்து, ஸ்வீடன் நாடுகளுக்கு 5 நாள் பயணம்...

.-----------------------------------

உலகம் சுற்றும் வாலிபன் புறப்பட்டு விட்டார் மீண்டும் .....
இங்கு எது நடந்தாலும் கவலை இல்லாதவர்   வேறெதுவும் கூற விரும்பவில்லை

நீங்கள் புரிந்து கொண்டால் சரி .

உங்கள் எண்ணங்களை பதிவு செய்ய வேண்டுகிறேன்  

மேலும்

  உங்கள் சிந்தனைக்கு....

************************​

வல்லரசு நாடாக்குவோம் என்று உறுதிமொழி அளித்து ஆட்சிப் பொறுப்பேற்று நிறைவேற்றுவோம் என்ற கூறிய வாக்குறுதிகளை நம்பியவர்கள் அனைவரும் ஆவலோடு இருந்த , இருந்திடும் இந்த காலத்தில் அதற்கு எதிர்மாறாக வன்கொடுமைகள் அதிகரித்து நாடே ஒரு போராட்டக்களமாக மாறிய நிலைதான் இன்று .பாலியல் வன்முறையும் நாளும் அரங்கேறி பால்மனம் மாறாத மலர்களையும் கசக்கிப் பிழிந்து கொடூரமான முறையில் கொலையும் செய்திடும் இந்த கொடுமையான காலத்தில் வாழ்கிறோம் என்பதை நினைத்தால் வருத்தம் மேலோங்கி விரக்தியே அதிகரிக்கும் நிலைதான் இன்று .ஆசிபா ​என்ற சிறுமிக்கு நடந்த பாலியல் பலாத்காரத்தால் 
இன்று நாடே கொதித்து எழுந்துள்ளது . இதற்கு உடனடியாக நீதி கிடைக்க போவதில்லை . நம் நாட்டு சட்டம் அதுபோன்று உள்ளது .
என்ன தண்டனை வழங்கினாலும் அந்த சிறுமி திரும்பி 
வரப்போவதில்லை .அவளுக்கிழைத்த அந்த கொடுமை எவருக்கும் இனி நடக்கவே கூடாது . இரத்தம் கொதிக்கிறது , நெஞ்சம் வலிக்கிறது ..

இதற்கு தீர்வுதான் என்ன ....எப்போது...எந்த முறையில் . என்ற கேள்விதான் அனைவரின் உள்ளத்திலும் எழுகிறது . பொறுப்பில் உள்ள அனைவரும் பொறுப்பற்ற முறையில் நடந்து கொள்வது கொடுமையிலும் கொடுமை இன்று .அதைவிட கொடுமை,தவறான பாதை என்னவெனில் மத நம்பிக்கை என்ற பெயரால் ஒருபுறம் திருவிழாக்கள் , பண்டிகைகள், கொண்டாட்டங்கள் என செயல்படுவதும், மறுபுறம் ஆர்ப்பாட்டம், போராட்டம், பேரணிகள் என்ற வடிவில் விதிமீறல்கள் சட்டவிரோதமான செயல்களில் ஈடுபட்டு பிரச்சனைகளை உருவாக்குவதும் நாளும் நடப்பது மிகவும் வேதனைக்குரியது. இதற்கு அடிப்படை காரணம் அரசியல் என்பது ஒருபக்கம் இருக்க , மதவெறி என்பதும், கொள்கை மாறுபாடுகள் இருப்பதும் தான் என்பதை யாரும் மறுக்க முடியாது.

இன்றைய காலகட்டத்தில் சமுதாயம் சீரழிவை நோக்க வேகமாக சென்று கொண்டிருக்கிறது என்பதை ஒப்புக்கொள்ளத்தான் வேண்டும்.பெண்களுக்கு பாதுகாப்பே இல்லை. நலிவற்ற சமுதாயம் மலரவேண்டும் என்பதற்காக பாடுபட்ட, கனவு கண்ட, மாபெரும் தலைவர்கள் வாழ்ந்து மறைந்தார்கள்.சாதிமத வெறி முற்றிலும் அழிக்கப்பட வேண்டும். மனித நேயம் தழைக்க வேண்டும். பகுத்தறிவு சிந்தனை ஆழ வேரூன்ற வேண்டும். ஏழை பணக்காரன் என்ற பாகுபாடு இல்லாமல் சமதர்ம சமுதாயம் மலரவேண்டும்.

இவையெல்லாம் நிறைவேற இன்றைய இளைய தலைமுறையினர் சிந்திக்க வேண்டும். வரலாற்று உண்மைகளை அறிந்து செயல்பட வேண்டும் என்பதும் எனது வேண்டுகோள்.

மக்களிடையே சீரான புரிந்துணர்வு ஏற்பட வேண்டும். பரந்த மனப்பான்மையும் தன்னலமற்ற மனநிலையும் வளர வேண்டும் .


பழனி குமார்
14.04.2018

மேலும்

​அனுபவத்தின் குரல் - 96 
--------------------------------------

​ஒரு சிலர் என்னிடம் பேசும்போது சாதாரணமாக கூறுவர் , அவ்வளவுதான் என் காலம் முடிந்துவிட்டது , இதுதான் என்னுடைய நிரந்தர நிலை என்று. அது அவர்களின் விரக்தியின் வெளிப்பாடா , வாழ்வின் விளிம்பில் நிற்கிறார்களா அல்லது நெஞ்சில் நிறைந்து வழியும் ஆதங்கத்தின் பாதிப்பா ...என்று தெரியவில்லை . ஒருவேளை போதுமென்ற மனதுடன் இருப்பவர்களா , இனி ஏதும் வாழ்வில் வளர்ச்சியடைய வழியில்லையென்று எடுத்த ஆழ்மனதின் குரலா என்றும் தெரியவில்லை . இது அவர்களின் கற்பனை எண்ணத்தால் விளைந்த ஏகோபித்த முடிவா என்றும் புரியவில்லை . அல்லது உணர்ந்து கொண்ட வாழ்க்கை சித்தாந்தத்தின் சிந்தனைத் துளிகளா என்றும் அறியேன் நான் . தாம் மேலும் மேலும் உயர நினைப்பவர்கள் , உவகையின் உச்சத்தைத் தொட விரும்புவர்கள் , அதற்காக முயற்சி செய்து கொண்டிருப்பவர்கள் நிச்சயம் அப்படி கூறமாட்டார்கள் . மனிதனாய் பிறந்த எவருக்கும் , என்னையும் சேர்த்துதான் , வாழ்க்கையின் எல்லையும் தெரியாது , முடிவின் விளிம்பும் தெரியாது , இறுதி நொடிப்பொழுதும் தெரியாது என்பது உண்மை . பின்பு ஏன் இந்த புலம்பல் , கூக்குரல் , பிதற்றல் அல்லது சோகம் ததும்பும் வசனங்கள் ...? 

அது அவரது தாழ்வு மனப்பான்மை என்றும் கூறலாம் ...தோல்வியின் அழுகுரல் என்றும் எடுத்துக் கொள்ளலாம் . நிறைவேறா ஆசையின் அலறல் என்றும் நினைக்கலாம் . ஆனால் அவர்கள் அனைவருக்கு ஒன்று கூறிட விரும்புவது அறிவுரையாக அல்ல , அனுபவத்தின் குரலாக ...அதுதான் முடிவல்ல எவருக்கும் . அந்த நிலைதான் இறுதியும் அல்ல வாழ்க்கையில் . அறிவும் ஆற்றலும் உழைப்பும் உண்மையும் இணைந்துள்ள ஒருவருக்கு என்றுமே தோல்வி என்பது நிலையல்ல ...அடுத்து பெறவுள்ள வெற்றியின் ஆரம்பநிலைதான் அது . அதனை மனதில் கொள்ளுங்கள் . ஒருவருக்கு ஏற்படும் மன உளைச்சலும் , வெறுப்பும் , விரக்தியும் , வேதனையும் , துக்கமும் , உள்ளத்து சோர்வும் நிரந்தரமல்ல ...இதனை ஆழமாக புரிந்து கொள்ளுங்கள் . 

இதுபோன்ற செயற்கை நிலைமாறி , எண்ணத்தில் தொய்வு ஏற்பட்டு செயல்களில் தேக்கம் ஏற்பட்டால் நாம் எதையும் சாதிக்க முடியாது என்பதே நிதர்சனமான உண்மை . பல தடைகளை கடந்துதான் , குறுக்கீடுகளை உடைத்தெறிந்துதான் , வலிவான நெஞ்சுறுதியால்தான் , இமாலய வெற்றியை அடைய முடியும் . வலுவான தேகம் மட்டும் போதாது வலிமை மிகுந்த அகமும் இருந்திடல் வேண்டும் . வளர்ச்சியை அல்லது ஒரு இலக்கை நோக்கி பயணிக்கும்போது , உடலாலும் மனதாலும் தளர்ச்சி அடைய கூடாது . அப்படி இருந்து சாதித்து காட்டியவர்கள் பலரும் இந்த உலகத்தில் வாழ்ந்து மறைந்துள்ளனர் , இன்னும் பலர் வாழ்ந்து கொண்டும் இருக்கிறார்கள் . அவர்களை போன்றவர்களின் சாதனையாளர்களின் வாழ்க்கையே நமக்கு ஒரு பாடம் . ஒரு வெற்றியை அடைய நாமே ஒரு அளவுகோலை நிர்ணயிக்க முடியாது . அதற்கு நமக்கெல்லாம் பண்பட்ட பகுத்தறிவுதான் துணை நிற்கும் .நமது வெற்றியும் வாழ்க்கையின் மகிழிச்சியும் நமது கையில் தான் உள்ளது . இது எனது அனுபவத்தின் குரல் . அனைவரும் உவகையும் எல்லையில்லா இனபமும் பெற்றிட வாழ்த்துகள் . ஏமாற்றம் எனும் இருள் அகல ஒளிமிகுந்த வாழ்க்கை நிலைத்திட , நம்பிக்கை எனும் திருவிளக்கை ஏற்றிடுங்கள் . வெற்றி நமதே .

     
  பழனி குமார்

மேலும்

ஏறி வந்த 

ஏணியை மறப்பது சுயநலம். ஏறியபின் 
ஏணியை மறைத்து வைப்பது அதீத சுயநலம்!

மேலும்

நான் நண்பர் ஒருவரிடம் பேசிக் கொண்டிருந்தேன். பொதுவாக நாட்டு நடப்புகளை பற்றி உரையாடல் சென்று கொண்டிருந்த போது அரசியல் பற்றியும் அலசினோம். நாங்கள் இருவரும் வெவ்வேறு கொள்கை உடைய இரு துருவங்கள். ஆகவே எங்களுக்குள் கருத்து மோதல்கள் வருவது வழக்கம்தான். பழகிவிட்டது. சிறிது நேரம் கழித்து எங்கள் பேச்சு முகநூல் பக்கம் திரும்பியது. 
அவர் கவிதை எழுதுகின்றவர் இல்லை எனிலும் படிக்கும் பழக்கம் உண்டு. எனது கவிதைகள் பலவற்றை படித்து கருத்துக்களும் பகிர்ந்துள்ளார். அதேபோல குறைகளையும் சுட்டிக்காட்டி உள்ளார்.அப்போது அவர் என்னை ஒரு கேள்வி கேட்டார். ஏன் உன்னுடைய கவிதைகள் பெரும்பாலும் சமுதாய தொடர்பு உள்ள சிந்தனை கள் மற்றும் சமுயாயத்தை சாடுவதாகவும் அமைகிறது. இது நீ தெரிந்து செய்வதா அல்லது உன்னையறியாமல் நிகழ்வதா என்று மிகவும் ஆர்வமாக வினவினார். நான் உடனடியாக பதில் அளித்தேன்.


 நிச்சயம் அறிந்தும் புரிந்தும் தான் எழுதுகிறேன் என்றேன். காரணம் என் மனம் சமுதாயம் மற்றும் வருங்கால தலைமுறை பற்றியும் தான் அதிகம் கவலைப்படுகிறது. 

இன்னும் சமுதாயத்தில் சீர்திருத்தங்கள் ஏற்படாமல் சீரழியும் நிகழ்வுகள் தானே அதிகம் நடைபெறுகின்றன. அதான் பகுத்தறிவு பாதையில் பயணமும் சிந்தனையும் செல்கிறது. தவறில்லை என்று நினைக்கிறேன். ஏன் உனக்கு இது பிடிக்கவில்லையா என்று எதிர் கேள்வி எழுப்பினேன். 
உடனே அவன் சிரித்துக் கொண்டே அதெல்லாம் ஒன்றுமில்லை. பாராட்டுக்குரியது தான். கவிஞர்கள் ஒவ்வொருவரும் அவரவர் வழியில் சிந்தனையும் எழுத்தும் அமைகிறது.அவன் மேலும் அப்படி என்றால் உன்னை # " சமுதாய கவிஞர் " என்று அழைக்கலாம் என்று நினைக்கிறேன். பொருத்தமாக இருக்கும் என்றார். 

நான் அப்படி நினைக்கவில்லை , சமுதாயத்தில் நானும் ஒரு கவிஞனாக பலராலும் அழைக்கப்படுகிறேன். அவ்வளவுதான் என்றேன். எனது விருப்பம் சமுதாயம் மாற்றம் பெறவும் மறுமலர்ச்சி அடையவும் இளைய தலைமுறையினர் பகுத்தறிவுடன் பல உண்மைகளை அறிந்து செயல்பட வேண்டும் என்பதும் அவர்கள் வளமான வாழ்க்கையும் சீர்திருத்தமடைந்த சமுதாயமாக வாழ வேண்டும் என்பதே எனது குறிக்கோள். 

அதற்காக நான் எனது இறுதி மூச்சு வரை என்னால் முடிந்த அளவுக்கு தொடர்ந்து எழுதுவேன். இது உறுதி.நான் இப்படி பேசியதும் நண்பர் சற்று உணர்ச்சிவசப்பட்டு எனது கையை பிடித்து கொண்டு எனக்கு என்ன சொல்வது என்றே தெரியவில்லை. உனது வித்தியாசமான பார்வை எனக்கு மகிழ்ச்சி அளிக்கிறது என்றும் நீ உன் பாதையில் சென்று உனது இலக்கை அடைய வேண்டும். வெற்றி பெற வாழ்த்துக்கள்என்றார்.இதை நான் இங்கே குறிப்பிட்டது பதிவிட்ட காரணம் என் நண்பரை போலவே சிலருக்கு என்னைப் பற்றி இதுபோன்ற எண்ணங்கள் இருக்க வாய்ப்புள்ளது. அவர்களுக்கு இந்த பதிவு என்னிலை பற்றி தன்னிலை விளக்கமாக அமைந்திடும் என்பதற்காக தான்.

எனக்கு எனது கவிதைகளால் பேரும் புகழும் கிடைப்பதை விட எனது காலத்தில் உள்ள இந்த சாதிமத வெறியும் ஏழை பணக்காரன் என்ற பாகுபாடும் வறுமையின் உச்சத்தில் வாழும் அடித்தட்டு மக்களின் நிலையும் முழுமையாக மாறி ஒரு புதிய சமுதாயம் மலரவேண்டும் என்பது எனது ஆழ்மனதின் விழைவாகும். இதன் மூலம் அனைவருக்கும் தெரியப்படுத்த விரும்பியதால் உங்களிடம் இதனை பகிர்ந்து கொள்கிறேன்.

வணக்கம்

பழனி குமார் 
07.10.2017  

மேலும்

மேலும்...

பிரபலமான எண்ணங்கள்

மேலே