இறகு தைத்த நினைவுகள்
கருவுற்ற கடல்
கரையில் வந்து
வாந்தி எடுக்கிறது
அலை அலையாய்
-------------------------------
இரவெல்லாம் ஒத்திகை
ஒத்துழைக்கவில்லை
வாய் திறந்த பூக்கள்
வார்த்தை மறந்துவிட்டது
-------------------------------------
நதி துரத்துவதால்
நதி ஓடுகிறது
--------------------------------------
நிலமயிர் மேல்
பனித்துளி - புல்
-------------------------------------
நிலத்தின்
முடி திருத்தும்
சவரக்காரர்கள் - ஆடுகள்
--------------------------------------
பரிமாறப்படுமா
உலக உருண்டை - பொதுவுடைமை
-----------------------------------
நிலவுக் காவலில்
விழிமூடி தூங்குது வானம்
விழித்ததும் விடிந்திடும்
-------------------------------------
ஒரு பூவுக்கு
பல்இதழ்
பூவைக்கு ஏன்
ஓர்இதழ்
----------------------------------------
ஊர் தள்ளி வைத்தது
கலப்புத் திருமணம்
தண்டவாளங்களுக்குள்
----------------------------------------
வெளியில் அழும்
குழந்தையை நினைத்து
பால் சுரந்தால்
உள்ளிருக்கும் அன்னை
கல்லறையில் ஈரம்
---------------------------------------------
வழியோர குடிசைகளுக்கு
வழி தெரியவில்லையே
பணக்கார குப்பைகளில்
விழி இல்லா சோறு
--------------------------------------------
சுரண்டல்களால்
சுரக்காத மார்பு
வெறுமையை குடிக்கிறது
வறுமை
--------------------------------------------
புழுங்கி வியர்த்த
உழைப்பை
விழுங்கி வீங்கிய
பிழைப்பு - முதலாளித்துவம்
--------------------------------------------------
தன் நிகழ்காலத்தை
காட்டிய கிளியை
திட்டியபடி
எதிர்காலத்தை காட்டியது
கூண்டுக்கிளி
