338 கயவரைச் சார்வதால் கணக்கிலாத் தீமையாம் - தீயரைச் சேராமை 7
கலி விருத்தம்
(விளம் விளம் மா கூவிளம்)
(மாச் சீரின் இறுதியில் குறிலோ, குறில்+ஒற்றோ தான் வரும். நெடில், நெடில்+ஒற்று வராது)
கயவரைச் சேர்ந்தவன் கலந்த போதவர்
செயலினை யெண்ணுவன் தினஞ்செ லச்செல
மயன்மிகுந் தவர்செயன் மகிழ்ந்த னுட்டிப்பன்
இயவரைச் சேர்தல்போல் இல்லைத் தீமையே. 7
- தீயரைச் சேராமை, நீதிநூல்
மாயூரம் வேதநாயகம் பிள்ளை பாடல்
பொருளுரை:
”கீழ்மக்களைச் சேர்ந்தவன் சேர்ந்த பொழுது அவர் செயலை இழிவாக நினைப்பான். நாட்கள் செல்லச் செல்ல மிகவும் மயங்கி அவர் செயலை மகிழ்ந்து அவனும் செய்வான்.
ஆதலால், கீழ்மக்களைச் சேர்தல்போல் பெருந்தீமை வேறொன்றும் இல்லை” என்கிறார் இப்பாடலா சிரியர்.
கயவர் - கீழ்மக்கள். தினம் - நாள். இயவர் - கீழோர்.
அனுட்டிப்பன் - அவனும் செய்வான், மயன்மிகுந்து - மையல் மிகுந்து
